Ако имате зголемен крвен притисок, веројатно сте загрижени како истиот да го контролирате. Загриженоста во секој случај ви е оправдана бидејќи да се постигне добра контрола на крвниот притисок е навистина тешка работа.
Високиот крвен притисок е најголем ризик фактор за срцевите заболувања (водечка причина за смрт во светот) и мозочен удар (4-та причина за смрт во светот) и тој предизвикува 1100 смртни случаи на ден.
Ако ви кажеме дека најголем дел од овие смртни случаи, можеле да бидат превенирани, најверојатно ќе се изненадите. Тоа е поради фактот што постојат ефикасни и релативно евтини третмани за висок крвен притисок но сепак, помалку од 44% од луѓето успеваат истиот да го контролираат.
Совети за контрола на крвниот притисок
Ефектот што крвниот притисок го има врз здравјето на луѓето и штетните последици кои тој ги предизвикува, допринесе да се даваат нови препораки од страна на докторите како би се подобрило здравјето на луѓето кои имаат висок крвен притисок.
Еве неколку совети кои може да ги применувате како би го контролирале крвниот притисок.
Многу е важно да се мери крвниот притисок во домашни услови
Мислењето дека најточни мерења на крвниот притисок може да се направат во лекарска ординација, повеќе не важи. Истражувањата во последните неколку години покажаа дека мерењата на притисокот од страна на доктор во ординација, не се секогаш точни. Тој процент изнесува дури 65%. Други истражувања покажаа дека мерењето на крвниот притисок дома може да даде поточна слика за ризиците и да го подобри контролирањето на крвниот притисок и да доведе до негово намалување.
Неколку експертски препораки за контрола на крвниот притисок, денес се базирани токму на мерењата на крвниот притисок во домашни услови. Крвниот притисок треба да се мери неколку пати во денот и најдобро е истото да се направи после одмор односно мирување од 5 минути.
Апчињата за притисок е подобро да се земаат навечер
Поради фактот што крвниот притисок е повисок во текот на денот, порано важеле препораките апчињата за притисок да се земаат во текот на денот, односно наутро. Но, последните истражувања покажале дека со земање на лековите за притисок навечер, се постигнува подобра контрола на крвниот притисок и се постигнува поголемо намалување на вредностите. Што е уште поважно, со ова се намалува ризикот од смрт, инфаркт, срцева слабост и мозочен удар. Единствено на кое треба да се внимава е лековите кои имаат диуретично дејство, да се земаат во текот на денот како би се избегнало честото одење во тоалет навечер.
Ако крвниот притисок тешко се контролира, консултирајте се со вашиот лекар во врска со некој хормонален проблем
Одамна е познато дека една од причините за висок крвен притисок е зголемена концентрација на хормонот алдостерон. Се мислело дека ова состојба е ретка но денес најновите истражувања покажале дека високата концентрација на алдостерон во крвта, е многу почеста појава и една од причините за зголемен крвен притисок. Во една студија се покажало дека дури 20% од луѓето кои имаат зголемен крвен притисок кој не може да се контролира, имаат високо ниво на алдостерон, но само 1 во 1000 е тестиран.
Она што треба да го знаете е дека, контролата на крвниот притисок во најголем дел зависи од вас. Промените во животниот стил како редовно вежбање, умерена и балансирана исхрана, избегнување алкохол и сол, постигнување на здрава телесна тежина се од исклучителна важност. Во некои случаеви, промените во животните навики се покорисни од било кои лекови за намалување на крвниот притисок. Освен промените во животниот стил, разговарајте со вашиот матичен лекар во врска со тоа како и кога да го мерите крвниот притисок дома, земајте ги лековите за притисок навечер и направете тестирање за нивото на алдостерон во крвта.
