Постојаниот умор негативно влијае врз повеќе здравствени аспекти
На прашањето дали се чувствувате уморни, ретко кој нема да одговори потврдно. И што преземате во врска со тоа? Доколку не го сметаме третото испиено кафе денес, што навистина преземате да си помогнете? Стрес, бучава, работа, премногу гледање телевизија, постојаното гледање во телефонот и недоволниот сон, се само дел од нештата поради кои сте постојано уморни.
Не го прифаќајте уморот како нормална состојба и одлучете да промените неколку навики во животниот стил.
Јадете неколку помали оброци и задолжително појадувајте
Редовното појадување се поврзува со намалување на нивото на кортизол, додека внесувањето храна на неколку часа, го одржува стабилно нивото на шеќер. На тој начин, телото е снабдено со доволно енергија за извршување на сите потребни функции. За да го избегнете чувството на летаргичност, не треба единствено да внимавате кога јадете, туку и што. За да имате енергија во текот на целиот ден, потрудете се вашиот ручек да содржи растителни влакна, протеини и здрави масти кои што ги има во рибата, оревите и маслинките.
Контролирајте ја телесната тежина
Намалувањето на телесната тежина доколку имате вишок килограми, не само што ќе направи да се чувствувате подобро во свое тело, туку и ќе ви помогне да го регулирате спиењето. Имајте на ум дека недоволниот сон ве прави подебели.
Заштитете се од бучавата
Бучавата од околината значително влијае врз здравјето и придонесува за постојаното чувство на замор. И покрај тоа што сме навикнати на надворешната бучава како и на звукот на телевизискиот приемник и компјутерот, телото ги чувствува сите тие звуци кои што негативно се одразуваат врз многу здравствени аспекти, како физички така и психички.
Почнете да вежбате
Вежбањето не само што значително ќе ви го подобри здравјето, туку и ќе ви го регулира спиењето, а квалитетниот сон е клучен за да бидете одморени и исполнети со енергија.
Легнувајте во исто време
Одењето во кревет секој ден во исто време не е само корисна навика која им ја кажуваме на децата, туку е многу важно за здрав организам и нормален биоритам. Затоа, одредете си оптимално време кое е најдобро за вас и секојдневно придржувајте се до него. Исто така, избегнувајте да работите на компјутер непосредно пред спиење или да заспивате со мобилниот телефон во рака, бидејќи оваа навика го нарушува природниот биоритам заради штетноста од сината светлина што ја емитуваат.
