Истражувачите од Универзитетот во Тел Авив развија нано-вакцина за меланом, најагресивниот тип на карцином на кожата! Нано вакцината се покажала доста ефикасна при проби кај глувци, велат истражувачите
Меланомот, исто така познат како малиген меланом, е канцер кој се развива од клетките кои содржат пигмент познати како меланоцити! Тој се развива во клетките на кожата кои произведуваат меланин или кафеав пигмент на кожата. Меланомот може да се развие било каде на кожата, а во 30-50% од случаите се развива од веќе постоечките невуси! Меланомите обично се појавуваат на кожата, но ретко може да се појават и на устата, цревата или окото. Кај жените најчесто се појавуваат на нозете, додека кај мажите на грбот. Некогаш се развива од бемка кај која настануваат промени како зголемување, гранична неправилност, промена во бојата, или појава на чешање.
Група истражувачи од Универзитетот во Тел Авив развија нано-вакцина за меланом, најагресивниот тип на карцином на кожата! Нивниот иновативен пристап досега се покажа доста ефикасен во спречувањето на развој на меланом кај моделите на глувци и во лекување на примарни тумори и метастази кои се резултат на меланомот!
Фокусот на истражувањето се нано честичките кои служат како основа за новата вакцина. Студијата била предводена од проф. Ронит Сачи-Фаинаро, шеф на Катедрата за физиологија и фармакологија и раководител на лабораторијата за истражување на ракот на Медицинскиот факултет на Саклер и проф. Хелена Флориндо од Универзитетот во Лисабон.
Војната против ракот воопшто, а особено меланомот, со текот на годините минувала низ различни модалитети на третмани, како хемотерапија, терапија со зрачење и имунотерапија. Проф. Сачи-Фаинаро вели „Во нашата студија, за прв пат покажавме дека е можно да се произведе ефикасна нано-вакцина против меланомот така што имунолошкиот систем го направивме чувствителен на имунотерапија“.
Истражувачите користеле мали честички, со големина од околу 170 нанометри, изработени од биоразградлив полимер. Во рамките на секоја честичка, тие „спакувале“ два пептиди – кратки ланци на аминокиселини, кои подоцна ќе се внесат во клетките на меланомот. Потоа, тие инјектирале нано честички (или „нано-вакцини“) во глушец кој има меланом.
Според објаснувањето на професор Сачи-Фаинаро, нано честичките дејствувале исто како и познатите вакцини за вирусни заболувања. Внесени во циркулација, тие го стимулираат имунолошкиот систем на глувците, а имуните клетки учат да ги идентификуваат, а потоа да ги нападнат оние клетки што содржат два пептиди – т.е, клетките на меланомот. Следствено на ова имунолошкиот систем на имунизираните глувци во иднина ќе ги напаѓа клетките на меланом ако и кога тие да се појават тие во телото!
Ова истражување јасно ја отвора вратата за целосно нов пристап – вакцинскиот пристап – за ефикасно лекување на меланом, дури и во најнапредните фази на болеста. Дали оваа платформа може да биде соодветна и за други видови на рак и дали ќе се постави една цврста основа за развој на други нано вакцини за рак?
Останува да откриеме!
