Многу луѓе пијат антибиотици на погрешен начин а воедно не внимаваат на исхраната
Многумина земаат антибиотици непотребно и на погрешен начин, најмногу заради недоволна информираност. Ваквите навики поттикнуваат развој на бактерии отпорни на антибиотици, затоа антибиотиците секогаш мора да ги препише лекар. Многу честа заблуда е земањето на антибиотици за лечење на грип и настинка, бидејќи антибиотиците не делуваат на вируси. Друга заблуда е да се земаат превентивно, за секој случај. Исто така, малкумина обрнуваат внимание на храната која ја консумираат за време на антибиотската терапија. Храната е многу важна, бидејќи одредени видови на храна, делумно или целосно ја намалуваат апсорпцијата, односно делувањето на некои видови на антибиотици. Затоа, во продолжение прочитајте која храна да ја консумирате а која да ја избегнувате во периодот кога земате антибиотици.
Храна којашто се препорачува
Лук
Лукот содржи ацилин, моќно соединение кое има антибактериско и антимикотично дејство, па затоа, лукот задолжително треба да се консумира при терапија со антибиотици.
Пробиотици
Најчест пропратен ефект од терапијата со антибиотици е дијареата. Токму затоа, се препорачува внесување на пробиотици, кои што со своето дејство воспоставуваат рамнотежа во дигестивниот систем. Важна напомена за пробитоците: тие треба да се земаат најмалку 2 часа по антибиотикот, бидејќи ако се земаат во исто време со него, тој ќе го уништи нивното дејство. Се препорачува да се земаат и по завршување на терапијата. Природен извор на пробиотици се јогурт, кефир, кисело млеко.
Витамин К
Бидејќи антибиотиците ги уништуваат „добрите“ бактерии во цревата, го оневозможуваат и создавањето на витаминот К. Зелениот листест зеленчук изобилува со овој витамин, како и жолчка од јајце, леблебија и леќа.
Храна која треба да се избегнува
Млеко и млечни производи
Овде не спаѓа јогуртот заради пробиотиците што ги содржи. Млекото треба да се избегнува особено доколку се пијат антибиотици тетрациклин. Тетрациклин се вид на антибиотици кои што не треба да се мешаат со производи што содржат железо и калциум, па ни млеко, бидејќи се намалува апсорпцијата, односно делотворноста на антибиотикот.
Кисела храна
Избегнувајте кисела храна, во прв ред цитрусни сокови, газирани безалкохолни пијалаци, чоколадо, домати.
Храна со многу хранливи влакна
Храната богата со растителни влакна е здрав избор доколку сакате да јадете помалку а да бидете сити подолго време. Ваквите производи , во прв ред житарки од цело зрно, не се препорачуваат при антибиотска терапија, бидејќи ја спречуваат апсорпцијата на антибиотикот.
Алкохол
Консумирањето алкохол треба да се избегнува при секоја терапија, но во комбинација со одредени антибиотици може да резултира со вознемирен стомак, мачнини и поспаност.
Сумирано кажано, храната која што треба да ја консумирате додека земате антибиотици треба да „соработува“ со терапијата, а не да ја саботира. Дневното мени треба повеќе да содржи варена храна, двопек, спанаќ, леќа, јајца, супа, јогурт, кефир, кисело млеко, соини производи и комбуха а помалку или воопшто да не содржи шеќер, торти, колачи, леб, тесто, пецива компир, зрнеста храна, печурки, индустриски овошни сокови.
Овие се неколку совети поврзани со комбинирањето на храна и антибиотици, но најпрво задолжително прочитајте го упатството од лекот и советувајте се со лекарот и фармацевтот за интеракцијата на антибиотиците со одредени видови на храна.
