Природни начини и неколку совети како да се ослободите од жиговина
Жиговина, горушица или пироза е непријатно чувство на киселост што се јавува во грлото предизвикано од стомачни киселини. Таа може да укажува на други проблеми и здравствени состојби, па затоа потребно е да се лоцира проблемот, а не само да се работи на спречување на симптомите и намалување на непријатното чувство. Се смета дека жиговината е поврзана со лошо варење, диспепсија, чир на желудник, ГЕРБ (гастроезофагеална рефлуксна болест), езофагитис, акутен или хроничен панкреатит, воспаление на желудникот, гастритис, нетолерантност на лактоза, а во ретки случаи, може да укажува и на карцином на желудник. Исто така, присуство на зголемена киселина од желудникот во устата е честа појава за време на бременоста и најчесто се појавува во последната фаза од бременоста. Иако повеќето истражувања тврдат дека ѓумбирот е делотворен за бременоста, некои сметаат дека не треба да се консумира во големи дози. Затоа треба да се напомене, дека за време на бременоста, пред да консумирате ѓумбир треба да се консултирате со својот гинеколог.
Ѓумбир против жиговина и стомачни тегоби
Ѓумбирот сè повеќе се користи, и тоа најчесто во кулинарството, но и како природен лек кој помага при многу состојби. Случајно или не, по форма наликува на стомакот, поточно на органот што му служи. Имено, својствата на ѓумбирот се најделотворни за стомакот. Тој одамна се користи за смирување на стомакот и стомачните тегоби, мачнини, утрински мачнини за време на бременоста и против жиговина, поточно чувството на жарење зад градната коска. Ѓумбирот докажано помага при состојба на диспепсијата или индигестијата, која се јавува кај 20 до 40 проценти од возрасната популација. Дневната доза на консумирање на свеж ѓумбир треба да изнесува од два до четири грама, бидејќи поголема доза може да предизвика нелагодност. Изрендајте малку свеж ѓумбир, ставете го во врела вода и направете вкусен чај, додајте го во храната или едноставно џвакајте го ако можете.
Избегнувајте ги продуктите кои што предизвикуваат киселини: алкохол, кафе, газирани напитоци, црвено месо, цигари, мрсна храна, брза храна, сосови. Овие продукти се на црвена листа за многу други здравствени состојби, па затоа нивното набројување не изненадува.
Видови на храна коишто се здрави и корисни за организмот, а не се поволни при состојба на осетлив желудник и киселини, а се дел од оваа листа, се доматите и цитрусни плодови како лимон, портокал и грејпфрут.
Затоа, доколку имате потреба од внес на витамин Ц, избегнете ги овие видови на храна и наместо нив консумирајте ацерола, шипки, магдонос или темнозелени листести зеленчуци. Грашакот е еден од најдобрите извори на протеини и хранливи влакна и може да биде замена за црвено месо за кое се смета дека предизвикува жиговина.
Неколку промени во животниот стил со кои ќе го превенирате и намалите нелагодното печење зад градната коска и чувството на киселост во устата:
- Јадете побавно за да избегнете прејадување. Исто така, порциите треба да бидат помали а оброците почести. Зачинетата храна сведете ја на минимум. Избегнувајте комбинации на храни од различни групи и овошјето јадете го најмалку 30 минути пред оброкот за да спречите негова ферментација во желудникот и проблеми со варењето;
- Освен видот на храната, подеднакво важен е и начинот на кој ја приготвувате храната. Најздрав начин е да готвите на пареа;
- По јадењето, никако не легнувајте. Најдобро е лесна кратка прошетка на чист воздух. Исто така, избегнувајте доцни вечери и закуски;
- Спијте на повисока перница.
