vezbanjeto-za-vreme-na-bremenosta
Споделете со пријателите!

Физичката активност за време на бременоста ќе ве исполни со енергија, ќе ви го подобри расположението, држењето на телото, ќе ви донесе подобар сон…
Нема ништо страшно во тоа да бидете физички активни за време на бременоста. Напротив, постојат многу причини зошто да ја вклучите физичката активност во вашето секојдневие кога бебето е на пат. Секако, посоветувајте се со вашиот лекар пред да започнете со било какви вежби додека сте бремена и ако добиете зелено светло прочитајте како тоа ќе ви ја олесни бременоста и како правилно да вежбате за да ги почувствувате сите придобивки.

Вежбањето за време на бременоста е полезно и може да придонесе за ваше подобро здравје

„Загревањето пред вежбање е од особено значење за време на бременоста, го подготвува телото и го спречува можното истегнување на мускул“

Откако вашиот лекар ќе потврди дека не е опасно да бидете физички активни во текот на бременоста, треба да знаете дека не сите видови на физичка активност се дозволени кога бебето расте во вашиот стомак. Пешачењето е одлично, а пливањето ги активира мускулите. Аеробикот е кардио вежба која го јакне срцето и белите дробови. Избегнувајте вежби кои бараат да стоите поголго време на исто место и кои можат да ја намалат циркулацијата на крвта, како и физички активности кои можат да ве доведат во опасност од паѓање како скијање, гимнастика, јавање, нуркање, спортови како фудбал, кошарка, итн. Загревањето пред вежбање е од особено значење за време на бременоста затоа што го подготвува телото и го спречува можното истегнување на мускул. Истегнувањето после вежбање е исто толку важно колку и самото загревање затоа што му овозможува на срцето да се стабилизира, а на телото да се опушти.

Прочитајте:  „Фитнес-селфи“ укажува на психолошки проблем

Што треба да правите додека вежбате и кога треба да престанете

Пијте вода пред, за време и после вежбањето за да не дехидрирате, и не заборавајте дека јадете за двајца, па затоа внесувајте ги потребните дневни калории. После првото тримесечје избегнувајте да правите вежби лежејќи на грбот. Не брзајте да го достигнете максимумот од 30 минути вежбање дневно. Започнете со 5 минути дневно и зголемувајте го времето за додатни 5 минути секоја недела се додека не ги достигнете тие 30 минути на ден.

Веднаш престанете со физичката активност и контактирајте го вашиот лекар доколку почувствувате болка во градите, отежнато дишење, главоболка, слабост во мускулите, забележите вагинално крварење, или некои слични симптоми.

Придобивки од вежбањето за време на бременоста

Како што рековме, да се биде физички активна е од големо значење за вашето здравје и за идното здравје на вашето бебе. Покрај ограничувањето на зголемената телесна тежина, вежбањето истовремено ве исполнува со енергија и го подобрува вашето расположение, ја намалува болката во грбот, надуеноста и отокот, го подобрува начинот на држење на телото доколку ја земеме во предвид зголемената тежина, ги зајакнува мускулите, ви овозможува поквалитетен сон, итн. Психолошките придобивки од вежбите се огромни. Со вежбање вие всушност одржувате контрола врз вашето тело кое во текот на бременоста се менува многу брзо.

Затоа трудници, земете ги вашите удобни патики и активирајте се.


Споделете со пријателите!