pharmanews-sovet-vo-sreda-uspeshna-kontrola-na-gerb-seriozen-zdravstven-problem-za-golem-od-vozrasnata-populacija
Споделете со пријателите!

Кои се ризик фактори за појава на ГЕРБ?
Гастроезофагеална рефлуксна болест (ГЕРБ) се јавува кај 30-40 % од возрасните и е хронично дигестивно нарушување при кое киселината од желудникот стигнува во хранопроводот, предизвикувајќи симптоми како печење, подригнување, болка во градите итн.

Најчести ризик фактори за нејзина појава се: прекумерна тежина, кила на желудникот, долгогодишно пушење и хроничен внес на алкохол, астма, дијабет, бременост и генетски предиспозиции. Одредени фактори дополнително предизвикуваат потенцирање на симптомите на гастроезофагеален рефлукс како што се: често внесување на масна и кисела храна, газирани и кофеински пијалоци, некои лекови како и долготрајно лежење кое го потенцира враќањето на желудочната содржина.

Кои симптоми го карактеризираат ГЕРБ?
Најчести симптоми со кои се соочуваат пациентите се:
  • Чувство на печење и болка во градите,
  • Засипнатост, воспалено грло
  • Сува кашлица
  • Тешкотии при голтање
  • Враќање на храна или киселински рефлукс
  • Гадење и подригнување.

Доколку истите не се препознаат навремено, не се побара лекарска помош и не се спроведе соодветна терапија може да настапат компликации од типот на: хронична кашлица, хроничен ларингитис со засипнатост на гласот, стеснување и оштетување и крварење на хранопроводот, и карцином на хранопроводот како најтешка компликација.

Терапија на ГЕРБ

Лекувањето на ГЕРБ вклучува фармаколошка терапија како и промена во животните навики кои имаат за цел намалување на изложеноста на хранопроводот на желудочниот сок со што се овозможува обновување на интегритетот на слузницата. Најчесто се користат лекови кои дејствуваат на неутрализација на желудочната киселина – антациди, како и лекови кои ја намалуваат секрецијата на желудочната киселина (ИПП инхибитори) во временски период обично од 6 до 8 недели. Освен тоа може да се вклучат и мукопротективи и прокинетици – лекови кои ја заштитуваат лигавицата на желудникот и ја забрзуваат пасажата на храната од храноводот во желудникот.
Во однос на промените во животниот стил се препорачуваат следниве:

  • Одржување на нормална телесна тежина.
  • Побавно јадење и добро џвакање на храната.
  • Избегнување на големи оброци, особено навечер.
  • Избегнување на кисела, пржена, масна, зачинета храна, газирани пијалоци, алкохол и кофеин.
  • Прекин на пушењето.
  • Да се легнува најмалку 2 часа по оброкот и при легнување главата да биде подигната од креветот.
  • Да не се наведнувате веднаш по јадење и генерално да избегнувате било каква потешка физичка активност.
Прочитајте:  Менаџерски синдром/Burn-out синдром– болест на модерното време!

Избегнување на лекови кои го потенцираат рефлуксот (ацетил салицилна киселина, витамин Ц).


Споделете со пријателите!