[дел 2] Микронутриенти кои се од особено значење за организмот

Дознавме нешто повеќе за витамините, а сега на ред доаѓаат минералите

Минералите се исто така дел од богатството на микронутриенти (првиот текст за витамините) кои ни се потребни за добро здравје. Тие се поделени во две групи: минерали кои ни се потребни во поголеми дневни количини (најмалку 100 мг на ден) и такви кои ни се потребни во помали количини (помалку од 100 мг). Нашето тело има потреба од минералите, а еве и зошто.

Минерали кои ни се потребни во поголеми количини

1. Калциум

Калциумот е многу важен минерал кој влегува во структурата на коските и забите. Потребен е за мускулна контракција, игра важна улога во клеточниот метаболизам и помага во згрутчувањето на крвта. Калциумот е особено важен за превенција на болест на коските во подоцнежните години. Премногу малку калциум може да предизвика остеопороза, додека пак преголеми количини предизвикуваат неурамнотеженост на минералите во организмот.

• Храна која содржи калциум: Млечните производи се основниот извор на калциум. Истиот може да се најде во кељ и кинеска зелка. Спанаќот и некои други зеленчуци содржат калциум, но истиот не се апсорбира лесно. Сардините и друг вид на конзервирана риба со коски, сокот од портокал и лебот се сметаат за дополнителни хранливи извори на калциум.

2. Магнезиум

Магнезиумот е исто така една од компонентите на коските, помага во згрутчувањето на крвта и е потребен за контракција на мускулите. Учествува во повеќе од 300 хемиски реакции во телото. Преголемо количество на магнезиум може да резултира со состојба на збунетост, нарушена функција на бубрезите, проблеми со дишењето и срцев удар. Недостаток на магнезиум може да се манифестира преку губење на апетитот и чувство на слабост.

• Храна која содржи магнезиум: Компири, зелено-лисни зеленчуци, зрнеста храна, јаткасти плодови, семки и мешунки.

3. Сулфур

Сулфурот помага во одржувањето на киселинско-базната рамнотежа и е дел од составот на некои витамини и амино киселини.

• Храна која содржи сулфур: Бидејќи сулфурот е составен дел на амино киселини, секоја храна која е богата со протеини е добар извор на сулфур.

Минерали кои ни се потребни во помали количини

1. Железо

Железото го пренесува кислородот низ телото и е доста битно за добар имунолошки систем. Железото учествува во создавањето на невротрансмитерите и развојот на мозокот и нервниот систем. Бремените жени имаат зголемена потреба од железо за да се обезбеди доволна резервна количина на железо за детето. Преголеми количини на железо може да предизвикаат гадење, повраќање, дијареа и опстипација. Недостатокот на железо е најчестиот вид на недостаток на хранливи материи. Вегетаријанците се соочуваат со зголемен ризик од недостаток на железо затоа што не јадат месо, а во ризичните групи спаѓаат и малите деца над 6 месечна возраст, адолесцентите, бремените жени и жените за време на месечниот циклус. Недостатокот на железо се манифестира преку анемија со симптоми како замор, забрзана работа на срцето, итн.

• Храна која содржи железо: телешко месо, џигер, школки, остриги, свинско месо, месо од живина, риба, тофу, мешунки, спанаќ, суво грозје, итн.

2. Хром

Хромот е познат по тоа дека го засилува дејството на инсулинот. Може да се најде во зрнеста храна, јаткасти плодови, темно чоколадо и пивски квасец.

3. Бакар

Бакарот игра улога во пренесувањето на железото. Џигерот, школките, мешунките, јаткастите плодови и семките се богати со бакар.

4. Јод

Јодот е дел од тироидните хормони и има улога во регулирањето на телесната температура. Недостатокот на јод ја попречува синтезата на тироидните хормони, а тоа резултира со состојба наречена хипотироидизам. Симптомите кои укажуваат на оваа состојба се замор, зголемена тежина и осетливост на ладно. Вишок на јод пак, може да предизвика хипертироидизам или хипотироидизам. Морската риба, џигерот, мешунките, компирите, јодираната сол и млечните производи содржат јод.

5. Селен

Селенот е важен за имунолошкиот систем и синтезата на тироидните хормони, а исто така ги заштитува клеточните мембрани од оштетување. Бразилските ореви се сметаат за доста богати со селен. Морската храна, зрнестата храна и месото се дополнителни извори. Недостатокот на селен може да го наруши одбранбениот систем на телото при борба со вирусни инфекции. Преголемо количество на селен може да резултира со кршливи нокти и коса и е најчесто резултат на неправилно користење на додатоците во исхраната.

6. Цинк

Цинкот е особено важен за нормален раст и сексуално созревање. Исто така, цинкот е доста важен за добар имунолошки систем и клеточна заштита. Остригите, телешкото месо и школките се богати со цинк. Зрнестата храна е исто така богата со овој минерал. Недостатокот на цинк може да го попречи растот и сексуалниот развој, може да го наруши имунолошкиот систем, да предизвика паѓање на косата и гастроинтестинални проблеми.