Постојаната изложеност на бучава бавно но сигурно го загрозува вашето здравје
Колкумина од вас не можат да заспијат без вклучен телевизор или пак имаат проблем да спијат во целосна тишина? Бидејќи сме постојано опкружени со бучава, се навикнуваме да живееме со неа и дури не ја ни забележуваме. Но иако сме ја прифатиле како составен дел од животот, не значи дека е корисна за нашето здравје. Постојат сè повеќе истражувања кои што истакнуваат дека постојаната надворешна бучава може да има негативно влијание врз здравјето. Ефектите може да бидат физички и ментални, а бучавата дури може да предизвика и пречки во способноста на децата за учење.
Неодамнешни истражувања откриваат дека бучавата од сообраќајниците и од авионите го зголемува ризикот од висок крвен притисок, особено доколку изложеноста на бучава се случува навечер. Бучавата од авионите, освен проблеми со слухот, исто така може да доведе до кардиоваскуларни и срцеви заболувања на оние што живеат во непосредната околина на аеродром.
Ефектите кои што бучавата ги има врз менталното здравје, резултираат со вознемиреност, мачнина и нарушен сон.
Вознемиреноста предизвикана од бучава може да влијае врз имунолошкиот систем. Зголеменото ниво на бучава, без разлика дали станува збор за бучава од автомобили, авиони, гласна музика или индустриска бучава, исто така, може да предизвика стрес, неможност за концентрација и да поттикне агресивно однесување, како и останати анти-социјални однесувања. Постојат и истражувања кои ја поврзуваат надворешната бучава со намалената способност кај децата за учење, односно тешкотија при читање и формирање на долготрајна меморија.
Зошто е штетна бучавата? Секако дека најпрво бучавата од возила и авиони директно се поврзува со загаденоста на воздухот. Загадениот воздух предизвикува воспалителни процеси и бројни заболувања, а авиоиндустријата е една од најголемите загадувачи на воздухот. Освен загаденоста на воздухот, постојаната изложеност на бучава, значително го подигнува нивото на стрес во телото, кое води до зголемување на крвниот притисок и неправилна работа на срцето.
