Дали вежбањето предизвикува стрес на срцето?

По напорен тренинг често мускулите во рацете и нозете не болат и се воспалени од замор, но што се случува со срцето кое исти така е мускул?

Има три вида на мускули: напречно-пругасти, познати и како скелетни, мазни и срцеви. Кога ќе го слушнеме зборот мускул прво што помислуваме е на ониае првите, скелетните. Тие се припиени за коските и работат по наша волја односно свесно може да ги натераме да контрахираат, освен дијафрагмата.

Скелетните мускули добиваат енергија од митохонријата, клеточна органела која ослободува енергија што се преобразува во аденозин трифосфат – АТФ важен за сите метаболички процеси. Овие мускули имаат од 1 до 2% митохондриа.

Мазните мускули контрахираат автоматски и помагаат на телото во варењето на храната, уринирање и многу други слични процеси.

Срцевите мускули се слични во градбата како и напречно-пругастите и влечат енергија за работа од митохондрија но сепак имаат неколку клучни разлики. Срцевите мускулни ткива имаат прилично висока митохондријална густина (содржат околу 30-35% митохондрија) што значи за ралика од скелетните имаат брза и поголема достапност до АТФ што пак значи дека се многу отпорни на физички замор.

Еден од најважните елементи за продуцирање АТФ е кислородот, па затоа доколку од некои причини не стига крв богата со кислород доаѓа до оштетување и/или срцев напад. Иако срцето не се заморува како скелетните мускули сепак не е отпорно на преголем напор. Кога сме изложени на интензивен и напорен тренинг, срцето едноставно реагира на биохемиските сигнали на телото и работи онолку за да ги задоволи потребите на организмот. Во мирување срцето пумпа околу 5 литри крв во минута, додека при трчање 5-6 пати повеќе, а притоа срцето нема потенцијал тоа да го работи со саати секој ден, со години, па така доаѓа до ширење на срцевиот ѕид и кинење на влакната. Со тек на време можно е да дојде до зголемување на срцето – хипертрофија и формирање лузни – фиброза. Магнетната резонанца кај маратонци кои долго време се занимаваат со тој спорт покажала многу лузни насекаде на срцето, а научниците измериле покачено ниво на срцеви ензими исто како при срцев напад.

Истражувачите сеуште не ги знаат сите фактори на овој процес сепак теоретски тврдат дека прекумерното вежбање предизвикува екстремен стрес на срцето.

Но сите се согласуваат дека најдобар начин за зачувување на здравјето на срцето, за запирање на стареењето имногу други здравствени придобивки е физичката активност но не и претерана. Активноста стимулира митохондријална биогенеза која е од огромен бенефит за здравјето.