tri-raboti-za-koi-nutricionistite-se-soglasuvaat
Споделете со пријателите!

Не постои еден и единствен правилен начин на исхрана кој се издвојува од останатите, сепак меѓу сите нив постојат одредени сличности според кои може да се насочувате што е правилно, а што не!
Исхраната е клучот на добро здравје и добар изглед, бидејќи „ти си тоа што го јадеш“. Меѓутоа кога станува збор за „правилна“ исхрана, тешко е да се дојде до еднозначен и концизен одговор. Постојат многу типови на исхрана, како ниско-јаглехидратна диета, диета според крвната група, вегетаријанска, веганска, хејева диета, сурова диета, медитеранска диета, ниско-калорична диета, диета за детоксикација, алкална диета, високо-протеинска диета, макробиотска диета, фрутаријанска диета, органска диета и многу други.

Не постојат штетни продукти, туку само штетни дози и комбинации

Според нутриционистите и експертите за здраво живеење, секој конкретен тип на исхрана зад кој тие стојат е најправилен, а сите останати не се во ред. Сепак и покрај бројните несогласувања и разликите во режимите на исхрана, меѓу сите нив постојат одредени сличности. Во денешно време нормално е да бидете збунети околу исхраната. Секој тврди нешто друго. Доколку се двоумите околу начинот на вашата исхрана и не сте сигурни дали е правилен и сте во небулоза од разни контрадикторни совети и сугестии од разни страни, не мора да започнувате за вас со нов режим на исхрана, што понекогаш значи отфрлање од исхраната на она што најмногу го сакаме, купување на чудни намирници и сл. Не плашете се. Имајте ги само овие три клучни точки пред вид:

Компромис 1: Намалете го внесот на шеќери

Единственото несогласување околу шеќерот е дали тој е лош за организмот или пак, многу лош. Светската здравствена организација го потврдува постоењето на бројни докази за тоа дека претераното консумирање шеќер доведува до дебелина и расипување на забите. Поради тоа оваа година донесен е предлог за промена на пирамидата на исхрана, со тоа што внесот на додаден шеќер не би требало да е повеќе од 10% од дневниот внес на калории. Шеќерот може да доведе и до зголемени триглицериди и лош холестерол, што е причина за дијабет. Дури и Асоцијацијата за шеќер – The Sugar Association покрај тоа што смета дека шеќерот игра важна улога во здравата диета и треба да се јаде шеќер, сепак потврдува дека единствената негова негативна страна е токму големата калорична вредност.

Прочитајте:  Алергија на храна: Сè што треба да знаете

Компромис 2: Избегнувајте ги вештачките транс масти

Здравите масти се клучни за апсорпција на витамини, за енергија и правилен метаболизам, како и за редуцирање на последиците од стрес. Вештачки создадените високо процесирани заменски делумно хидрогенизирани масти, како што е на пример маргаринот, порано се сметаше дека се здрави за срцето. Сепак, тие имаат нездрави и неприродни транс масти. Транс масти постојат и во природна форма, како на пример оние во млечните продукти. Нутриционистите се согласуваат околу тоа дека овој тип на масти вклучувајќи ја и конјугираната линолинска киселина се наоѓаат некаде помеѓу безбедни и корисни. Овие вештачки транс масти се најзастапени во високопроцесираната „ѓубре храна“ (junk food) и ниту еден режим на исхрана и ниту еден нутриционист не го одобрува и оправдува консумирањето на овој тип производи, со кое и СЗО се согласува.

Компромис 3: Консумирајте повеќе зеленчук

Компирите претставуваат зеленчук, меѓутоа бидејќи имаат скроб многу нутриционисти не ги сметаат како зеленчук, а многумина имаат дилеми и околу мешунките. Сепак, околу листестиот зеленчук и останатите форми на зеленчук – речиси сите се согласни. Во разните салати лежи здравјето. Тие содржат течности, витамини и минерали и растителни влакна. Во оваа категорија потешко е да се вметне овошјето, бидејќи веднаш многумина би се побуниле дека постојат овошни плодови кои имаат премногу шеќери. И покрај тоа, дури и д-р Роберт Ластиг – Robert Lustig тврди дека шеќерот во овошјето – фруктозата е во ред.


Споделете со пријателите!