Научете како да ги разликувате однесувањата коишто означуваат злоупотреба на алкохол и зависност од алкохол
Алкохолизмот е болест која се лекува, доколку се препознае навреме. Процесот на лекување е долг и единствениот лек е доживотна апстиненција од алкохол. Секој може да стане зависник од алкохол независно од пол, возраст или социјална класа. Многу често, алкохолизмот е маскиран со бурен социјален живот, кога се гледа само веселата страна од оваа зависност, но тој често може да биде тежок, а воедно и опасен за животот на алкохоличарот но и за луѓето околу него.
Алкохоличарите не можат да го контролираат своето пиење дури ниту кога алкохолот станува директна причина за сериозна штета, вклучувајќи медицински заболувања, брачни проблеми, загуба на работата. Алкохолизмот е комплексен проблем кој опфаќа социјално-медицински и економски аспекти.
Причини поради кои некој посегнува по алкохол:
Психолошко-генетички причини. Истражувањата покажуваат дека алкохолизмот се пренесува во семејствата – алкохоличарите имаат 6 пати поголеми шанси од неалкохоличарите да имаат роднина во семејството кој е зависник од алкохол.
Причини од средината. Научниците тврдат дека проблемите поврзани со алкохолот се резултат на комплексна интеракција меѓу биолошките влијанија и факторите на средината. Факторите на средината кои можат да влијаат на развивањето на болеста се личното однесување, пријателските влијанија во раниот живот, однесувањето на родителите, социјални и културни мислења кон алкохолот, животен стрес и расположливоста со алкохолни пијалаци.
Психолошки влијанија. Многу експерти тврдат дека губењето на контрола врз пиењето е психолошки поврзано.
Знаци на зависност
Тешко е да се биде објективен кога треба да прифатите дека вие или ваша блиска личност има проблем со алкохолот. Иако границите не се јасно дефинирани (кое однесување и во колава мера се смета за алкохолизам), има неколку важни знаци за препознавање. Најпрво треба да се разграничи дали станува збор за зависност или злоупотреба на алкохол.
Однесување кое означува злоупотреба на алкохол
- Црни дупки. После пиење, не можете да се сетите што се случувало, односно имате „црни дупки“.
- Ризично однесување. Пиење во ризични ситуации, на пример пред да влезете во автомобил.
- Загрозување на здравјето. Продолжувате со пиење иако имате здравствени проблеми.
- Неодговорност. Имате проблеми со завршување на обврските на работа или во училиште заради честото опивање.
Знаци на зависност
- Немате контрола врз количината. Прекумерност или неможност да се запре со пиење откако еднаш ќе започнете.
- Поголема количина. Морате да пиете повеќе за да го добиете истиот ефект.
- Голема толеранција на алкохол. Способност прогресивно да се пијат сè поголеми количества на алкохол без видливо опијанување.
- Се чувствувате физички лошо ако не пиете. Кога ќе престанете со пиење имате болки во стомакот, се потите прекумерно, чувствувате тресење на телото и вознемиреност.
- Сте се откажале од сите други активности. Не ве интересира ништо друго освен алкохол. Алкохолот веќе го презел начинот на живот, запуштајќи сè друго.
- Вина. Чувствувате вина после пиење.
- Пиете сами. Пиете сами и наутро, или пак поголем дел од денот сте пијани.
- Имате физички знаци на зависност од алкохол. Губење на тежината, вознемирен стомак или гастритис, црвенило на носот и образите.
