Прочитајте како да му помогнете на вашето дете полесно да го помине периодот на транзиција од одмор во обврски
Со исклучок на неколку лектири за чие што читање најчесто било потребно многу убедување, летото е најзабавниот дел од годината за секое дете. Со почетокот на новата школска година, доаѓаат и промените, таа за детето претставува цел нов свет. Токму затоа е важно да се почне добро, а тоа пред сè значи организирано и со голема поддршка од ваша страна, бидејќи иако како што растат, бараат поголема независност, ним секогаш им е потребна вашата поддршка.
Со цел вашето дете што полесно да премине од безгрижно лето во училишни обврски, може да направите неколку работи.
Разговарајте
Блиската комуникација со детето е клучна за воспитувањето, па така и во овој процес на транзиција, посветете му што повеќе време на вашето дете со цел да ги дознаете неговите вистински чувства за враќањето во клупа. Периодот на враќање во училиште, кај сите деца предизвикува одредени чувства, секако во зависност од нивната возраст и претходните искуства на училиште:
- Чувство на вознемиреност и стрес дали ќе ги исполнат очекувањата на родителите и наставниците;
- Возбуда бидејќи ќе се видат со школските другарчиња;
- Возбудени и љубопитни за новите книги и училници;
- Тажни за крајот на летото.
Подгответе ги заедно сите книги и потребен прибор
Разгледајте ги сите учебници и пронајдете нешто интересно со што ќе го поттикнете љубопитството на вашето дете. Набавете сè што е потребно и дајте им избор да одлучат што сакаат. Со самостојното одлучување им ја подобрувате самодовербата, која е многу важна на самиот почеток на школската година.
Повеќе забавни активности
Времето е уште топло, што значи дека е идеално за активности на отворено. Со цел вашите деца полесно да се вратат на рутината, овозможете им квалитетно поминато слободно време. Тоа значи, потрудете се да им биде интересно и секој викенд поминете го надвор од дома.
Време е за ново хоби
Информирајте се за нови воншколски активности но прво разговарајте што сака вашето дете да прави во слободно време. Нов спорт или инструмент, не е важно, важно е детето да се радува на новото хоби кое ќе му помогне полесно да го прифати враќањето во училиште.
Бидете пример
Децата се водат од вашиот пример, па така, најделотворно учење е преку пример. Детето ве имитира вам и вашите постапки, па доколку сакате тоа да биде дисциплинирано, бидете и вие. Првите неколку недели, обидете се да станувате порано од вообичаеното, за да имате време да подготвите сè навреме и да не брзате накај училиште. Едноставно кажано, овозможете му погодна домашна атмосфера и стабилни семејни односи.
