Откриени се нови оштетувања во мозокот предизвикани од стрес, но научниците исто така работат врз соодветен инстантен антидепресив
Хроничниот стрес може да направи да се чувствуваме преморени, анксиозни или депресивни, без желба за живот. Научниците неодамна покажаа дека прекумерниот стрес ја менува структурата на мозокот. Новото истражување го докажа овој феномен на глувци. Кога тие доживувале пролонгиран стрес, во нивните мозоци се случувале структурни промени, особено во амигдалата. Тоа е дел од мозокот што ги регулира основните емоции за преживување, како што се стравот и анксиозноста. Токму овие промени што настанале во нивните мозоци се поврзани со анксиозните и депресивните душевни нарушувања што се среќаваат кај луѓето.
За среќа научниците работат врз создавањето на лекот за овие мозочни промени
Новиот експериментален лек може да ги превенира овие промени. „Постоеја гласини дека амигдалата има комплексна улога врз стресот. Кога ние погледнавме подетално на три региони во овој дел, откривме дека невроните во медијалната амигдала, се повлекуваат поради хроничен стрес“ – истакна главниот автор на студијата д-р Карла Наска – Carla Nasca. „Додека ова репрограмирање може да доведе до нарушувања како анксиозност и депресија, нашите експерименти со глувци покажаа дека невролошките и промените во однесувањето поради стрес може да бидат превенирани со терапија со ветувачки потенцијален антидепресив којшто дејствува брзо“ – додава таа.
Стресот не дејствува врз сите на ист начин
Ова важи како за глувците, така и за луѓето, некои единки едноставно се многу поранливи. Д-р Наска и нејзините колеги во експериментот вклучиле глувци кои биле изложени на повисок ризик од појава на анксиозност и депресија. Третманот со ацетил карнитин исто така се покажа како заштита кај глувците, сугерирајќи дека сличен превентивен пристап може да биде од корист и за луѓето кои се посклони кон депресивно однесување. Луѓето и глодарите природно ја произведуваат оваа состојка под нормални услови и неколку модели на животни склони кон депресија имаат недостаток од ацетил карнитин. Во една друга студија, д-р Наска и нејзините колеги истражуваат дали луѓето со депресија имаат абнормално ниски нивоа на оваа молекула.
„Хроничниот стрес е поврзан со голем број на психијатриски состојби и ова истражување може да понуди некои нови сознанија за нивната патологија. Се чини дека е можно спротивставените реакции што ги гледаме во рамките на амигдалата и лимбичкиот систем во целина, можат да придонесат за различни симптоми на овие болести, кои може да варираат од избегнување на друштвен контакт, па се` до појава на живописни флешбекови“ – вели коавторот на студијата д-р Брус Мекјуан – Bruce McEwen.
