Опијатите можат да ги влошат болките, да предизвикаат зависност, но и смрт од предозирање
За среќа, на европскиот континент, па и кај нас не е толку популарно препишувањето на силни лекови против болки како што е случајот во САД. Новите насоки на Центарот за контрола на болести и превенција (CDC) ги обесхрабруваат американските лекари во препишувањето на одредени опијати за проблеми со грбот, мигрени, артритис и други хронични состојби. Ова беше рутинска практика изминативе две децении.
„Скоро сите опијатни лекови против болки што лекарите ги препишуваат може да создадат зависност како и хероинот“ – истакнува директорот на CDC, д-р Том Фриден – Tom Frieden.
Упатените насоки од страна на Центрите се дел од федералниот одговор на растечката стапка на зависници од опијати во САД. Од 1999 година, повеќе од 165 илјади луѓе починале од причини поврзани со употреба на лекови против болки. Околу 250 милиони рецепти за опијати биле препишани во САД само во 2013 година, како што велат аналитичарите – сосем доволно за секој возрасен Американец да поседува по едно шишенце од овие силни апчиња од кои пациентот може лесно да се предозира.
Многу лекари го поздравуваат овој апел за промена. „За прв пат Владата јасно говори за тоа дека општо прифатената практика за третирање на најчестите состојби со долготрајни опијати е несоодветна“ – додава д-р Ендрју Колодни – извршен директор на „Лекари за одговорно препишување на опијати“ Physicians for Responsible Opioid Prescribing. Анализите пронајдоа научни студии кои докажуваат дека краткотрајното користење на лекови против болки може да им помогне на пациентите, но не постојат докази за да се одредат долготрајните придобивки.
Кои се новите насоки?
Експертите од CDC препорачуваат лекарите да одбираат други третмани наместо опијати, вклучувајќи и помалку потентни лекови како што се ацетаминофенот и ибупрофенот, режими на вежбање, бихевиорална терапија и инjекции. Доколку мора да бидат препишани силните опијати, тогаш лекарите треба да ја препорачаат најмалата возможна доза и да ги надгледуваат пациентите во случај на злоупотреба. Исто така, се препорачува периодот од три дена како период за краткорочно третирање на акутни болки, како што е на пример постоперативниот период или траумите.
