Новата молекула „отворач“ може да биде најновата одбрана во борбата со вирусот ХИВ, односно подлога за иден развој на вакцина
За време на тестирањето на неодамна развиената молекула JP-III-48 врз примероци од серум на ХИВ позитивни пациенти, истражувачите од Универзитетот во Монтреал, Канада – University of Montreal in Canada забележале нешто револуционерно. Молекулата имала способност да го отвори вирусот ХИВ како цвет. Покрај тоа што ова откритие е во своите зачетоци, тимот истражувачи се надева дека истото може да биде основа за новите ХИВ превентивни мерки, па дури и начин за елиминирање на вирусот од лицата кои веќе се инфицирани.
Дел од причината зошто за научниците им е толку тешко да создадат вакцина за ХИВ е поради тоа што овој вирус има уникатен начин за избегнување на имунолошкиот систем. Покрај тоа што телото на инфицираниот создава антитела против ХИВ, сепак на човечкиот организам му е многу тешко да воспостави ефективен имунолошки одговор против него. Неодамнешна студија објавена во Зборникот на Националната академија на науките – Proceedings of the National Academy of Sciences предлага начини за одбрана од овој вирус. Вирусот наликува на цврсто запечатена лименка.
Наоѓањето начин за „отворање“ на вирусот ХИВ може да им овозможи на антителата да допрат до најосетливите делови од вирусот и да ја елиминираат инфекцијата.
Истражувачите од Харвард и од Универзитетот во Пенсилванија ја развија молекулата JP-III-48, но истражувачите од Монтреал беа први во успешното тестирање врз ХИВ позитивни пациенти. Оваа молекула го имитира CD4, протеин лоциран на површината од Т-лимфоцитите. CD4 функционира како врата за Т-клетките. Во студијата од Монтреал истражувачите го додадоа JP-III-48 во серумот од пациенти инфицирани со ХИВ-1 (најчестата форма на ХИВ) и беа сведоци на ефектот на „отворање на цвет“.
„Додавањето на малата молекула го принудува вирусот да се отвори како цвет“ – главниот автор на студијата, Џонатан Ричард – Jonathan Richard објаснува во соопштението за медиумите. Молекулата го присилува вирусот да ги изложи деловите коишто се препознаени од страна на антителата од домаќинот. Антителата кои се веќе присутни потоа можат да прејдат во напад и да ги убијат инфицираните клетки.
„Антителата кои природно се присутни по инфекцијата, потоа можат да ги нападнат инфицираните клетки со што ќе бидат убиени од страна на имуниот систем“ – додава Ричард.
Друг фактор што го прави лекувањето на ХИВ речиси невозможно е тоа што дури и вирусот целосно ако се исчисти од телото, од него остануваат многу траги и резерви кои само чекаат да се развијат повторно, откако лекувањето ќе престане. Доколку научниците успеат да развијат начин за активирање на овие скриени резервоари, тогаш тие ќе можат да бидат уништени, користејќи т.н. „шокирај и убиј“ метода, користејќи ја молекулата „отварач“ и присутните антитела.
До сега ова револуционерно откритие беше тестирано само врз серум од позитивните пациенти, но наскоро истражувачите се надеваат дека ќе можат да ја тестираат оваа молекула и врз мајмуни со слична верзија од ХИВ вирусот. Тие велат дека ова откритие може да има огромен потенцијал во истражувањето и развојот на вакцина против ХИВ.
