Постојаната вознемиреност може да го наруши квалитетот на живот но и здравјето
Вознемиреноста е нормална реакција на стрес. Стресниот начин на живот често води кон запоставување на здравјето а бидејќи психата и лошите мисли работат постојано, многумина мислат дека сигурно патат од неизлечива болест (којашто немаат време да одат да ја откријат и ги поминуваат деновите во страв од болест). Неоснованиот страв од болест е хипохондрија, психичко нарушување на личност којашто е окупирана со здравјето без објективна заснованост а во исто време, навистина ги чувствува симптомите што ги опишува.
Освен хипохондрици, тука се и оние со поинаква вознемиреност, односно вид на „пасивна“ грижа: избегнување на лекарски прегледи, физичка активност и сè што може дополнително да поттикне вознемиреност. Оваа состојба на окупираност со здравјето, иако не е нарушување, сепак не е за занемарување.
Ваквата загриженост може да доведе до анксиозност и панични напади коишто можат да преминат во реални нарушувања или заболувања.
Хроничната грижа (вознемиреност) може да влијае врз секојдневниот живот до тој степен, што може да го наруши апетитот, животните навики (прејадување, пушење, претерано консумирање алкохол, злоупотреба на дрога), врските, сонот и работната способност.
Што влијае на ваквото однесување
Неоснованата вознемиреност од можна неизлечива болест, најчесто е поттикната од лесната достапност на многу информации поврзани со здравјето, па сите стануваат „Гугл“ лекари. Врз ваквото однесување можеби најмногу влијае животното искуство. Болест или смрт на блиска личност, може да поттикне вакво однесување. Други причини се голем стрес, научено однесување односно воспитување и депресија.
Еден од најпознатите хипохондрици е режисерот Вуди Ален. Тој за себе вели дека е „алармист“ а не хипохондрик. Во еден негов есеј тој пишува како на сред ноќ, во итна помош, му кажале дека меланомот на вратот за кој бил убеден дека е смртоносен, бил всушност љубовен белег (шљифка). Овој пример соодветно ја истакнува комичната страна на оваа непотребна вознемиреност, којашто воедно претставува и страв од смртта, што е нормално човечко чувство. Сепак, паниката (од болест или страв од смртта) се решава со точна информираност, едукација и секако, посета на лекар доколку сметате дека нешто не е во ред со вас.
