Благодарение на навремените прегледи ќе бидете поштедени од здравствени проблеми во иднина. Вашето здравје е во ваши раце
Како и мажите, така и жените треба да бидат одговорни кога станува збор за своето здравје. Заинтересирајте се за вашето здравје и прочитајте кои се потребните испитувања и прегледи кои вие, жените, треба да ги направите во текот на својот живот.
Како што рековме, со навремените прегледи и испитувања може да се избегнат здравствени проблеми во иднина.
Тироидна жлезда
Тироидната жлезда може да предизвика други посериозни заболувања доколку не се лекува. Затоа се потребни навремени проверки на оваа жлезда. Консултирајте се со вашиот лекар кога станува збор за возраста на која треба да започнете со проверки.
Минералната густина на коските
Доколку имате над 65 години консултирајте се со вашиот лекар и испитајте ја минералната густина на коските. Со помош на ова испитување можете да ја откриете остеопорозата и да го спречите напредувањето на оваа болест.
Мамографски преглед
Се препорачува да правите мамографски преглед, односно испитување за рак на дојка, секоја година или на секои две години штом ќе наполните 40 години. Со редовните мамограми би можеле да го откриете ракот на дојката во рана фаза и да превземете мерки за да го спречите неговото ширење. Но сепак, најдобра е консултација со вашиот лекар во однос на тоа дали е потребно и колку често треба да се прави мамограм. Прегледите на градите се препорачливи еднаш на 3 години ако имате од 20-40 години, и секоја година кај жените над 40 години. Прегледите ги прави вашиот лекар и истите можат да откријат некоја промена на градите која ќе биде потребно дополнително да се испита.
Рак на грлото на матката
Ракот на грлото на матката се открива со редовни пап-тестови. Препорачливо е да правите пап-тестови на секои 3 години ако сте на возраст од 21-30 години. Над 30 години, најдобро е да правите комбинација од пап-тест и ХПВ-тест на секои 5 години, или пак ако нема можност за ХПВ-тест тогаш продолжете со редовни пап-тестови на секои 3 години. Вашиот гинеколог може да ви препорача почести пап-тестови доколку има потреба. Гинеколошкиот преглед опфаќа и други прегледи освен пап-тестот и ХПВ-тестот. Редовните годишни гинеколошки прегледи се препорачливи за жените за да може навремено да се откријат и дополнително да се испитаат здравствени проблеми како и да се спречи нивното напредување. Ако имате над 65 години обратете се на лекар за тоа дали треба и колку често треба да правите вакви испитувања.
Сексуално преносливи болести
Вашиот лекар може да ви објасни се за сексуално преносливите болести, за тоа како да се заштитите и какви испитувања ви се потребни. На сите сексуално активни жени им се препорачувада се испитаат за болести како ХИВ, кламидија, сифилис и други инфекции во консултација со вашиот лекар.
Рак на дебелото црево
Направете испитувања за рак на дебелото црево доколку имате над 50 години. Постојат неколку видови на испитувања кои можете да ги направите, а вашиот лекар ќе ви објасни кои испитувања се потребни и колку често треба да се испитувате. Ако имате под 50 години и сте имале случај со рак на дебелото црево или полипи во вашата фамилија, консултирајте се со лекар за тоа дали е потребно да се испитате.
Дијабетес
Ако се соочувате со висок крвен притисок или прекумерна тежина се препорачува да се нарави испитување за шеќерна болест. Жените кои имаат над 45 години може да се испитуваат за дијабетес на секои 3 години. Шеќерната болест може да им наштети на другите органи во телото како срцето, мозокот, очите, бубрезите, нервите, итн.
Висок крвен притисок
Крвниот притисок треба да се проверува на секои две години без разлика на вашата возраст затоа што високиот крвен притисок може да предизвика мозочен удар како и проблеми со срцето, очите и бубрезите. Доколку имате над 65 години или пак сте помлади а веќе имате проблеми со срцето, бубрезите или пак страдате од дијабетес можеби ќе треба да го проверувате крвниот притисок почесто.
Холестерол во крвта
Започнете со испитувања за холестерол во крвта на секои 5 години после 35та година од животот. Испитувањата за висок холестерол во крвта уште од 20 годишна возраст се потребни доколку пушите цигари, имате висок крвен притисок, дијабетис, прекумерна тежина, или ако вие или член на вашата фамилија има проблеми со срцето. Раното откривање на холестерол може да спречи срцеви заболувања.
Кожен преглед
Вашиот лекар може да ви препорача прегледи на кожата од време на време. Консултирајте се со него ако мислите дека ви е потребен таков преглед. Со редовните кожни прегледи може да се откријат загрижувачки бемки или дамки на кожата или пак рак на кожата во рана фаза.
Преглед на заби
Се препорачува проверка на забите секоја година (два пати годишно е најдобро) за да може навремено да се лекуваат.
Преглед на очи
Одете на очен преглед еднаш на секои две години ако се соочувате со проблеми со видот.
