Брзиот живот и секојдневните обврски ни одземаат голем дел од нашето слободно време, но не треба да си дозволиме да го запоставиме нашето здравје. Здравјето треба да ни биде на прво место
Редовните прегледи треба да ни бидат навика, а не обврска. Тие можат да ни помогнат да спречиме одредена болест уште пред да се појават првите симптоми, а со тоа ние самите си овозможуваме подолг и поквалитетен живот. Според информацијата споделена на веб страната на Американската национална медицинска библиотека – U.S. National Library of Medicine – MedlinePlus кога станува збор за здравјето кај мажите постојат неколку задолжителни испитувања кои тие треба да ги направат во текот на нивниот живот за да го зачуваат своето здравје.
Како што рековме, со навремените прегледи и испитувања може да се избегнат здравствени проблеми во иднина.
Рак на белите дробови
Доколку имате од 55-80 години и сте пушач со долга историја на пушење цигари или пак сте се откажале од пушењето цигари во изминатите 15 години препорачливо е да се консултирате со вашиот лекар за тоа дали да се прегледате од рак на белите дробови.
Рак на дебелото црево
Испитувањата за рак на дебелото црево се препорачливи од 50 годишна возраст па нагоре. Постојат неколку видови на испитувања со кои може да се открие ова заболување, а вашиот лекар ќе ви препорача кој тест ви е потребен. Ако имате под 50 години и ако во вашата фамилија имало случај со рак на дебелото црево или полипи обратете се на лекар за тоа дали ви е потребно испитување.
Рак на простатата
Мажите треба да се консултираат со својот лекар за преглед за рак на простатата кога имаат 50 години или повеќе, а доколку во вашата фамилија имало случај со рак на простатата, консултирајте се за преглед и порано. Ако лекарот потврди дека е потребно испитување, се препорачува тестот за Простата Специфичен Антиген или PSA test, но сепак не е докажано дека потенцијалните придобивки од тестот ја надвишуваат штетата која е направена при тестирањето. Веќе не се извршуваат рутински испитувања на простатата кај мажите доколку не постојат симптоми.
Хепатитис Ц
Се препорачува да се испитате за хепатит Ц доколку:
- сте родени помеѓу 1945 – 1965 година
- некогаш сте земале дрога со вбризгување
- сте примиле трансфузија на крв пред 1992 година
Редовните испитувања за оваа болест се препорачливи кога станува збор за зависници од дрога кои земаат дрога со вбризгување.
Остеопороза
Посоветувајте се со вашиот лекар дали да се направи испитување за остеопороза ако сте на возраст од 50-70 години и доколку кај вас постои ризик за остеопороза како резултат на долготрајна употреба на стероиди, пушење цигари, ниска телесна тежина, пиење алкохол или пак фамилијарен случај на остеопороза.
Абдоминална аортна аневризма
Испитајте дали имате аневризма на абдоминална аорта ако сте на возраст од 65-75 години и ако сте или некогаш сте биле пушач. Испитувањата се прават со ултразвук.
Висок крвен притисок
Крвниот притисок треба да се проверува барем на секои две години (доколку имате над 65 години проверувајте го на една година) без разлика на вашата возраст затоа што високиот крвен притисок може да предизвика мозочен удар како и проблеми со срцето, очите и бубрезите. Доколку веќе имате проблеми со срцето, бубрезите или пак страдате од дијабетес проверувајте го крвниот притисок секоја година.
Дијабетес (Шеќерна болест)
Редовните проверки за дијабетес се од особено значење затоа што шеќерната болест може да им наштети на другите органи во телото како срцето, мозокот, очите, бубрезите, нервите, итн. Испитувањата за шеќер во крвта се препорачуваат кога имате висок крвен притисок. Ако имате над 45 години прегледите за дијабетес се препорачуваат на секои 3 години.
Холестерол во крвта
Ако имате над 34 години треба да го испитувате холестеролот во крвта на секои пет години. Висок холестерол може да предизвика проблеми срцето како и слаба циркулација. Започнете со испитувања за висок холестерол во крвта уште од 20 годишна возраст доколку пушите цигари, имате висок крвен притисок, дијабетис, прекумерна тежина, проблеми со срцето или ако некој член на вашата фамилија имал срцев удар пред да наполни 50 години (за мажите) односно 60 години (за жените).
Преглед на заби
Се препорачува еднаш годишно да се прави проверка на забите за да може навремено да се лекуваат доколку е потребно.
Преглед на очи
Ако имате проблеми со очите одете на задолжителен очен преглед на секои две години.
Сексуално преносливи болести
Испитајте се за болести како ХИВ, кламидија, сифилис и други инфекции без разлика на вашата возраст во консултација со вашиот лекар.
