Неколку практични совети за започнување на денот
За продуктивен ден потребен е квалитетен сон но и добар утрински почеток, бидејќи по утрото денот се познава. Имајте на ум дека колку порано се разбудите, толку повеќе ќе имате време за да го испланирате денот што претстои. Исто така, едно истражување тврди дека ранобудните луѓе се посреќни и поуспешни за разлика од оние што се будат подоцна. Бенџамин Френклин рекол дека „раното одење во кревет и раното будење, го прават човекот здрав, богат и мудар.“ Освен тоа, доколку одлучите да се будите порано, може да направите уште неколку поволни промени кои што позитивно ќе влијаат на вашето утринско расположение и ќе ви дадат енергија за денот што претстои.
Наместете го креветот
Колку и да звучи неважно и безначајно, прва работа што треба да ја направите веднаш по станувањето од кревет е да го наместите креветот. Оваа мала активност всушност дава чувство на реализираност, односно претставува успешен почеток кон извршување на дневните задачи и обврски.
Искажете благодарност
Потрудете се првата утринска интеракција да ви биде искажување на благодарност кон некого. Ова ќе ви даде чувство на задоволство и среќа, кое што понатаму се манифестира во проактивност и зголемена продуктивност при извршување на работните обврски.
Пуштете музика
При процесот на будење, музиката може да биде поефективна дури и од шолја кафе. И покрај тоа што за ова не се потребни додатни истражувања, тие сепак постојат, и тврдат дека пријатната музика со умерен ритам го подобрува утринското расположение и ја зголемува енергијата.
Време за себе
Одделување барем дваесет минути за себе, значи многу за вашето расположение. Правете нешто во што уживате, без оглед дали е тоа добра книга, читање успешни приказни или пак вежбање.
Во секој случај, нема правила, најважно е да го правите она што најмногу ви одговара. Најважно е да ги пронајдете своите идеални утрински ритуали и да се придржувате кон нив без многу размислување. Утрото претпоставува следење на одредена рутина, која што не значи дека треба да биде сувопарна како што звучи. Затоа, наместо рутина, направете си мали но значајни ритуали за да имате успешен и реализиран работен ден.
