Ако и вие сте дел од луѓето кои во секое време можат да најдат изговор за да го прескокнат вежбањето, тогаш следете ги овие совети. Вашето тело ќе ви се заблагодари!
Да бидеме реални, многумина од нас сме биле полни со енергија кога сме започнале со вежбање и не сме пропуштале ниту еден ден, а после неколку недели веќе секојдневието нè натерало постепено да се препуштиме на изговорите и оправдувањата кога станува збор за редовно вежбање. Изгледа како мотивацијата и волјата да нè напуштаат, а ние се бориме да ги „одржиме во живот“. Мишел Сејгар – Michelle Segar објаснува што е потребно за да го прифатиме вежбањето како наша секојдневна рутина засекогаш. Еве кои се нејзините совети.
Сè се смета
Постојат различни видови на физички активности кои не мора да одземаат многу време или да бидат напорни за да се сметаат за вежба. На пример, шетањето на кучето може да ви одземе десетина минути, играњето со децата уште петнаесетина, работењето во градината исто толку минути, па дури и туркањето на количката во маркетот може да ви одземе дваесетина минути. Сето ова треба да се смета како физичка активност. Според Мишел, ова ги прави луѓето да се чувствуваат успешни секој пат кога се движат.
Фокусирајте се на тоа што можете да го направите во сегашниот момент
Откако ќе го прифатите советот дека секаква физичка активност е важна, лесно ќе најдете време за уште една друга која ќе можете да ја вметнете во вашиот распоред. Наместо да мислите дека немате време за вежбање, запрашајте се како можете да ги искористите тие единствени пет – десет минути што ви се на располагање. Неколку стомачни вежби или качување по скалите ќе завршат работа.
Правете го тоа што ве расположува
Изберете таква физичка активност која ве расположува и која ќе сакате да ја повторувате постојано. Ако уживате додека вежбате тогаш нема голема веројатност дека ќе се откажете, што значи дека избирањето на вистинскиот тип на физичка активност е од големо значење.
Промените треба да се случуваат постепено
Кога сакаме да започнеме здрав живот, често сакаме да направиме сè одеднаш, вежбаме поинтензивно, се ставаме под режим на исхрана, итн. Правиме сè во знакот на здрав живот, а тоа може да биде напорно. Се препорачува најпрво да се фокусирате на вежбањето кое треба да биде забавно за да бидете мотивирани за понатаму. Мишел додава дека најдобро е вежбате кога сакате вие, да одделувате онолку време колку што имате и да си одберете тип на вежбање кое ќе ве расположува.
