dali-mesecharenjeto-e-opasno_image
Споделете со пријателите!

Месечарењето во детството е вообичаена фаза којашто децата ја пребродуваат со текот на годините
Дали сте го забележате вашето дете часови по вообичаеното време за спиење да лута низ домот со збунет поглед? Ако вашето дете е месечар, не грижете се бидејќи не сте единствени. Можеби е вознемирувачки, но месечарењето кај децата е многу честа појава која вообичаено се пребродува по одреден период во детството. Но, сепак, некои едноставни совети може да помогнат за поголема безбедност при месечарењето кај вашето дете

Што претставува месечарењето?

Месечарење или сомнамбулизам, претставува пореметување на сонот кое може да варира од едноставно и безопасно до несоодветно или, пак, во ретки случаи, ризично или опасно. Месечарењето е фаза помеѓу длабокиот сон и свесноста. При месечарење човекот извршува активности во сон што се својствени за свесниот период, па оттука, месечарите понекогаш стануваат од креветот и шетаат во домот или надвор од него, а притоа кога ќе се разбудат воопшто да не се сеќаваат на тоа. 

„Месечарењето кај децата вообичаено се случува еден или два часа по заспивањето и може да трае од неколку секунди до триесет минути“

Додека спиеме, нашиот мозот преминува низ пет фази на спиење – 1, 2, 3 и 4 фаза и REM фаза, односно „брзо движење на окото“. Заедно овие фази го формираат циклусот на спиење кој вообичаено трае од 90 до 100 минути. Следствено на ова, човекот доживува околу четири или пет циклуси на спиење во периодот на една ноќ. Месечарењето вообичаено се манифестира за време на подлабокото спиење, осносно во 3-та и 4-та фаза. Во овие две фази, на пример, е потешко да разбудите некого, а откако ќе го разбудите тој би се чувствувал дезориентирано и замаено неколку минути. Месечарењето кај децата вообичаено се случува еден или два часа по заспивањето и може да трае од неколку секунди до триесет минути.

Причини за месечарење

Месечарењето кај децата е многу почесто отколку кај возрасните и вообичаено престанува до десеттата година. Исто така, месечарењето може да биде наследно, па оттука, доколку вие или вашиот партнер сте месечари, би било можно и вашето дете да биде. Други фактори коишто може да поттикнат месечарење се:

  • недоволно спиење;
  • болест или треска;
  • неправилен распоред на спиење;
  • одредени лекови;
  • стрес;
  • кошмари;
  • нарушување на дишењето во спиењето. 
Прочитајте:  Дали фиџет-спинерите се потенцијална опасност за здравјето на децата?

Однесувањето при месечарење

Станувањето од кревет и лутање наоколу со збунет поглед додека сè уште спиете е една од вообичаените форми во кои се манифестира месечарењето. Но кај децата месечари, исто така, може да се забележат и следниве форми на месечарење:

  • зборување во сон;
  • мокрење во сон;
  • трапаво движење наоколу;
  • неодговарање на прашања;
  • седење во кревет и правење активности што се повторуваат, како триење на очите и сл.

Дали месечарењето е опасно?

Во суштина, месечарењето само по себе не е опасно и не е знак дека вашето дете има некаков психолошки или емоционален проблем. Но, сепак, додека одредени епизоди на месечарење може да бидат едноставни и безопасни, други може да бидат комплексни и ризични и оттука, важно е да ги следите следните совети доколку забележите дека вашето дете месечари:
dali-mesecharenjeto-e-opasno_image1

  • обидете се да не го будите бидејќи може да создаде страв туку нежно водете го назад во креветот;
  • обезбедете ја соодветно надворешната врата и затворете ги внатрешните врати и прозорците во домот;
  • тргнете ги од видик острите и кршливи предмети;
  • редовно собирајте ги играчките од подовите во домот.

Други начини да му помогнете на вашиот мал месечар

Доколку епизодите на месечарење не се чести и не вклучуваат ризични активности, не е потребно да се грижите и да го третирате месечарењето како опасност за здравјето на вашето дете. Но доколку е често, предизвикува проблеми и продолжува да се случува и по 10-тата година, обратете се кај вашиот доктор. За децата коишто често месечарат, докторите вообичаено го препорачуваат третманот познат како „закажано будење“.

На овој начин циклусот на спиење кај детето се нарушува, а тоа влијае позитивно и помага во прекинување на месечарењето во текот на ноќта. Во многу ретки случаи лекарот може да препише лекови за месечарење.


Споделете со пријателите!