Прочитајте ги советите за здрав животен стил од експерт за здравје и внесете промени во вашето секојдневие
Сите сме во потрага по нашиот баланс помеѓу она каде сме сега и она каде сакаме да бидеме, со цел да живееме посреќен, поздрав и поквалитетен живот. Секој од нас има сопствена претстава за тоа како идеалното здравје и благосостојбата треба да изгледаат и таа слика може да се коси со сликата на некоја друга индивидуа – сите сме различни, пишува авторката Ема Хајдук (Emma Hajduk) и сертифициран експерт за здравје и благосостојба на духот, умот и телото за The Huffington Post. Еве неколку нејзини основни совети кои можат да ви помогнат во пронаоѓањето и задржувањето на животната рамнотежа.1. Хранете се правилно
Здравата правилна исхрана е клучот за добар изглед и за да се чувствувате најдобро во своето тело. Вие сте она што го јадете, а храната може да биде и отров и лек, зависно од количините и комбинациите. На пример, доколку купите нов автомобил и користите неквалитетно гориво, постои многу голема веројатност дека ќе се расипе побрзо. Исто е и со нашите тела – доколку консумираме нездрава високо процесирана храна со адитиви, конзерванси, други хемикалии и рафиниран бел шеќер, наместо свежи квалитетни хранливи оброци од органски производи и домашна готвена храна, телото нема добро да функционира. Здравата храна му овозможува на телото и сите процеси во него да функционираат на најоптимално ниво. Со зајакнување на имуниот систем, на организмот му даваме алатки за полесно да се справува со потенцијалните болести. Ќе ви се подобри спиењето, ќе бидете посвежи и со повеќе енергија и ќе имате повеќе концентрација и појасен ум.
2. Физичка активност
Кога се движиме и сме физички активни, тогаш имаме најубав проток на енергија во телото. Не без причина се вели: „Во здраво тело – здрав дух“. Редовното вежбање е вториот клучен елемент за здрав и среќен живот и за одржување на телото во најдобра кондиција и здрава телесна тежина. Физичката активност му помага на телото да ја одржи оптималната густина на коските, мускулната јачина и подвижноста на зглобовите. Физиолошка благосостојба се подобрува и со кондициони тренинзи, а се зајакнува и имунитетот. Не се лишувајте од неколку минути посветени на движење на телото секој ден, кога вам ви одговара.
3. Помалку технологија
Иако технологијата е насекаде околу нас и ни го олеснува животот, таа со себе носи и голема цена којашто ја плаќаме со нарушено здравје. Кога излегувате со пријателите, колку време вистински со нив разговарате, а колку време гледате во мобилните телефони и разговарате преку социјалните мрежи, без разлика што сте еден до друг? Многу родители се плашат дека нивните деца ќе пораснат во антисоцијална средина во која нема да постојат социјалните вештини. Луѓето секогаш најдобро живеат кога меѓусебно разменуваат позитивна енергија како безгранична љубов, почит, разбирање, толеранција.
Бидете промената што сакате да ја видите во светот и покажете им на своите деца дека тие за вас се поважни од вашите мобилни телефони и компјутери.
Не дозволувајте технологијата да ги попречува вашите семејни средби и средбите со пријателите, моментите за вежбање, рекреација и одмор, за да не бидете расеани и за да можете свесно да се посветите на она што го правите во моментот.
4. Квалитетен сон
Нашите тела имаат потреба од квалитетен сон со цел да се регенерираат и одморат. Недостатокот од квалитетен вечерен сон е поврзан со зголемувањето на телесната тежина, недостаток на концентрација и ослабен имун систем. Добрите здрави навики за спиење ни помагаат да се чувствуваме расположени во текот на целиот ден, а телото полесно се справува со стресот. Првиот начин за тоа како да постигнете здрав и убав сон е исклучување на електронските уреди. Не заспивајте со мобилните во рака. Негувајте го биоритамот со легнување и станување во приближно исто време и спијте најмалку 8 часа во деноноќие.