За основен превоз до работа или училиште, за рекреација или фитнес, ништо не е подобро од велосипед
Возењето велосипед е едноставна работа и како што вели старата изрека, никогаш не се заборава. Како деца, возењето велосипед по околните маала и паркови беше вистинско доживување, задоволство и авантура. Денес, како постари, возењето велосипед изгледа комплицирано иако тоа воопшто не е различно од тогаш.
Возењето е одлична активност која помага при губењето вишокот на килограми, за зајакнување на издржливоста на организмот, намалување на нивото на стрес, регулирање на крвниот притисок и да не заборавиме дека е забавно подеднакво како во детските златни времиња. Има и други причини за возење велосипед, особено во споредба со автомобил. Високата цена на горивото, трошоците за оддржување, поправки, паркинг, еколошки и многу други причини.
Многумина наоѓаат изговори и причини да не се качат на велосипед
На прв поглед се чини дека треба многу опрема, но, вистината е дека за возење е потребно само волја и велосипед. Добро е да се има добра опрема, но, користењето само на кацига е огромен бонус. Иако со цената плаќате поквалитетен велосипед, за почеток секој велосипед во добра состојба, е доволно добар да ве однесе до таму каде што сакате.
Безбедноста е најзагрижувачка. Во сообраќајот се вклучени возачи на автомобили за кои сообраќајните правила не важат затоа потребна е голема претпазливост кога се вози велосипед. Препорачливо е велосипедистите, како учесници во сообраќајот да ги почитуваат правилата, да носат светла облека, да сигнализираат на кривини и секако подобро е да возат на дневна светлина.
Седиштето знае да биде неудобно, но, постојат различни видови седишта. Затоа одберете го она кое најмногу ви одговара. Нека не ве плаши кондицијата. Кога ќе се уморите застанете и пешачете особено по угорнини. Колку повеќе возите толку полесно ќе ви биде. Кондицијата бргу се стекнува. Луѓето често го избегнуваат велосипедот како превозно средство до работа за да не се испотат возејќи. Понекогаш е тешко да се избегне тоа, но кога би возеле со прикладно темпо и во добар ритам, неколку километри нема да ве испотат. И возејќи ве пирка ветре што ќе ве разлади. А можете и да носите резервна облека во ранец или корпа.
Доколку се решите за велосипедизам најважно е да знаете на почеток да не се форсирате. Возењето активира друг сет на мускули во однос на другите вежби и на телото му треба време да се навикне на овој вид на напор. Возете полека по 5-6 км на ден, уживајте во возењето и постепено зголемувајте ја дистанцата и темпото. И уште еднаш да споменеме дека е многу важно да бидете претпазливи во сообраќајот и да почитувате сообраќајни правила.
Велосипедизмот сигурно ќе ви помогне да бидете посреќни и поздрави.
