Уште едно истражување коешто докажува дека брусницата всушност не е ефективна во борбата со уринарните инфекции
Уринарните инфекции се најчесто заболување на уринарниот тракт и доколку не се третираат навремено, може да доведат до оштетување на бубрезите. Честа или итна потреба за мокрење, течење на урина, чувство на печење при уринирање, јак или непријатен мирис, болка за време на сексуален однос или болка во пенисот кај мажите, се едни од најчестите симптоми на инфекција на мочните канали.
Жените се повеќе склони од ваквиот вид на инфекции и тоа заради повеќе ризик фактори, почнувајќи од:
- женската анатомија – жените имаат пократок мочовод од мажите, со што се намалува патот на бактеријата којашто побрзо стигнува до бешиката);
- сексуалната активност – сексуално активните жени повеќе заболуваат од овие инфекции а ризикот се зголемува при промена на партнер;
- контрацепција – жените коишто користат дијафрагма (средство направено од гума и се става на отворот на матката како средство за контрацепција) или спермициди;
- менопауза – по менопаузата, намалувањето на нивото на естроген предизвикува промени во уринарниот тракт и ги прави жените поподложни на инфекција.
Лекувањето на овие инфекции е со давање антибиотици, во комбинација со чаеви. Најмногу се препорачуваат чаевите од магдонос а особено чајот од брусница. Познато и нашироко прифатено верување поврзано со делотворноста на чајот од брусница е дека таа е моќна исто колку антибиотик и некои дури ја користат како алтернативна медицина односно единствено средство за лечење. Постојат многу докази и истражувања, коишто докажуваат дека брусницата всушност не помага при овие инфекции, но ова мислење сè уште се наметнува.
Еден од методите на разликување на медицина основа на научни докази од алтернативната медицина, е начинот на кој двете се соочуваат со нови контрадикторни докази. Едноставно кажано, науката ја менува медицината, додека алтернативната медицина не се менува, колку и да се докажува дека нема ефект. Така и со користењето на брусницата, докази и истражувања има, а сè уште се промовира како лек за лечење уринарни инфекции.
Зошто се смета дека брусницата помага?
Научниците од постарите теории сметале дека брусницата штити од уринарни инфекции со тоа што ја зголемува киселоста на урината, со што му прави потешкотии на бактериите како ешерихија коли да навлезат до уринарниот тракт. Поновите теории пак, укажуваат дека брусницата им отежнува на бактериите да се залепат (задржат) за ѕидовите на уринарниот тракт. Ваквите позитивни теории за корисноста на брусницата, беа популарни во 90тите години на 20 век.
Во 2012 година, едно големо истражување составено од 24 студии, со вкупно 4,473 учесници, заклучило дека брусницата не може да се препорачува како превенција (а уште помалку како лек) за уринарни инфекции.
Последното истражување уште еднаш го потврдува истото. Јутани Мехта (Juthani-Mehta), вонреден професор на престижниот универзитет „Јеил“, заедно со неколку колеги, спровеле истражување врз 147 жени од повеќе старски домови, од кои 31 процент ја имале бактеријата која предизвикува инфекција. Бидејќи напитоците од брусница им се тешки за пиење на постарите жени заради интензивниот вкус и шеќерот што го содржат, при тестирањето, истражувачите користеле капсули од брусница, коишто содржеле 36 мг активна состојка на проантоцианидин (proanthocyanidin).
Жените биле поделени во две групи; на едната група им биле давани по две капсули со наведената состојка, додека другите добивале плацебо. Кај ниедна испитаничка немало никакви промени, со што истражувачите уште еднаш ја докажале неефективноста на брусницата при превенција и лечење на уринарни инфекции.
