Сексуалните односи во овој животен период не треба да бидат извор на незадоволство
Постменопауза е периодот кога жената немала менструален циклус цела година. Менопаузата и постменопаузата се нормални природни процеси кои што го означуваат крајот на репродуктивната возраст кај жената. Но дали тоа значи дека жените треба да се лишат од сексуални односи? Секако дека не. Постојат многу начини кои што ќе ви овозможат добро здравје во оваа животна доба а со тоа и добро сексуално здравје.
Исто така, има и многу поволности во кои може да уживате во „златното доба“. Во овој период, не треба да се грижите за менструални циклуси, за деца или несакана бременост. Исто така, на оваа возраст вие точно знаете што сакате во креветот, а со тоа уживањето е загарантирано. Во прилог следат неколку важни нешта на кои задолжително треба да им посветите внимание за да имате добро интимно здравје и поволни сексуални односи.
Промена на хормоните
Во овој период вагинална сувост е нормална заради хормоналните промени. Затоа, сексот може да биде непријатен и да не го посакувате. Исто така, кај некои жени се намалува и сексуалниот нагон заради губењето на естрогенот и потребна е поголема сензуална стимулација. Побарајте соодветен и квалитетен лубрикант кој ќе ја намали сувоста и консултирајте се со гинеколог.
Задолжителни гинеколошки прегледи
Мамографски прегледи, редовни прегледи, ПАП тестови, остануваат задолжителни и после губењето на менструацијата. Исто така, вие сте сè уште во ризик од сексуално преносливи инфекции – СПИ, затоа, иако можеби не треба да се грижите за бременост, употребата на кондом е задолжителна.
Физичка активност
Редовното вежбање ја зголемува издржливоста и флексибилноста. За жените, особено се делотворни клекнувањата. Исто така, за да се задржи тонусот на вагината, кегеловите вежби се задолжителни. Со редовно вежбање и со кегелови вежби, тонусот на вагината останува поцврст а тоа значи поголемо сексуално уживање.
Комуникација
Добрите сексуални односи подразбираат добра комуникација со партнерот. Во овој период жената поминува низ многу промени, па разбирањето од страна на партнерот е клучно. Бидете отворени и разговарајте за вашето тело, но и за тоа што чувствувате.
Повеќе здрава храна
Нивото на енергија, расположението, спиењето, стресот и либидото се поврзани меѓусебно и зависат од храната што ја внесуваме. За некои видови на храна се претпоставува дека го зголемуваат сексуалниот нагон како мака, какао, кокос, авокадо и мед, но во секој случај, здравата храна значи и добро здравје, а доброто здравје претпоставува добро сексуално здравје.
