Погледнете се подобро во огледало и дознајте ја вашата здравствена состојба
Човековото тело е совршен организам. Тоа секогаш ни дава знаци доколку нешто не е во ред, затоа е многу важно да знаеме да ги препознаваме сигналите што ни ги испраќа. Во организмот сè е поврзано и зависно едно од друго. Доколку еден дел не е во ред, тоа се одразува врз друг дел. Да го земеме за пример лицето. Ако внимателно погледнеме и знаеме да ги препознаеме симптомите на лицето, можеме навремено да си помогнеме и да воочиме состојби, кои можеби не би ги откриле на друг начин. Секако дека денес постојат софистицирани рентген машини и магнетна резонанца кои ги откриваат болестите, но не е на одмет да научите сами да ги читате знаците што ги испраќа телото.
Лицето претставува мапа на здравјето и врз него се исчитува нашата здравствена состојба и начинот на живот. Затоа, огледувањето не треба да се сфаќа како чин на суета, туку како желба за подобрување на здравствената состојба преку препознавање на симптомите што ќе ги прочитате подолу.
Очи
Очите не се само прозорец кон светот, туку и прозорец – индикатор за здравствената состојба. Бели кругови околу ирисот, можат да бидат знак за висок холестерол. Покачено ниво на масти може да се манифестира со масни грутки на очните капаци. Исто така, паднатите очни капаци, можат да бидат и знак на оштетување на нервите (при одреден вид на парализа).
Кожа
Доколку бојата на кожата е жолтеникава, тоа може да претставува несакан ефект од одредени лекови, најчесто лекови за дијабетес или за висок крвен притисок. Длабоки брчки на кожата пак, може да укажуваат на остеопороза. Ако кожата на лицето е малку отечена, можеби производот за кожа што го употребувате е премногу силен за вас. Во овој случај се советува пиење многу вода.
Образи
Црвени образи можат да бидат знак на воспаление на кожата или зголемено ниво на хормонот кортизол (при синдром на Кушинг). Овој хормон предизвикува отекување на крвните садови, што првично се одразува врз најчувствителните делови на лицето, а тоа се образите. Виолетови образи може да алармираат на ниско ниво на кислород во крвта.
Уста
Мали рани на краевите од устата може да укажуваат на недостаток на витамин Б. Потрудете се да внесувате витамин Б преку храна со полно зрно, заедно со зеленчук кој има зелена боја. Сува уста најчесто е знак на дехидрација, но доколку е постојано сува а не сте пушач или на терапија со лекови, тогаш може да биде знак на дијабетес. Чиреви во устата може да укажуваат на намален имунитет. Доколку чиревите не поминат после четири дена, обратете се на лекар.
Нос
Имате голем нос? Ќе се израдувате кога ќе дознаете дека голем нос значи помалку настинки. Колку физички е поголем носот, толку е поголема бариерата која што ги спречува бактериите. Големиот нос дава природна поголема заштита на устата како и на дишните патишта и ги намалува знаците на инфекција.
Непријатен здив
Лошиот здив може да укажува на заболување на црниот дроб но и дигестивни проблеми. Кога станува збор за барање на причини за отстранување на непријатниот здив, најпрво треба да се земе во обзир состојбата на забите и непцата.
Коса
Кршлива коса може да значи дека имате недостаток на протеини. Исхраната богата со железо и есенцијални масни киселини ќе ја направи косата појака и поздрава. Многу тенка коса може да укажува на проблеми со тироидната жлезда, така што најдобро е да се посети лекар.
