Црниот дроб има големо влијание врз целокупната здравствена состојба на организмот. Обрнете внимание на знаците кои ве предупредуваат дека можеби се соочувате со заболување на црниот дроб
Црниот дроб е најголемиот внатрешен орган, а воедно и најголемата внатрешна жлезда во човечкиот организам. Раното откривање на болестите поврзани со црниот дроб може да го продолжат вашиот живот затоа што истиот е одговорен за многубројни функции кои се од особено значење за вашето здравје. Помага во варењето на храната, особено во разградувањето на мастите, ги отстранува токсините, како на пример алкохолот, од организмот, го контролира нивото на холестерол во крвта, итн. Некои од најчестите симптоми кои нè предупредуваат за можни заболувања на црниот дроб се:
- лош здив
- темни кругови под очите
- темна боја на урина
- пожолтување на кожата и на белките на очите
- гадење
- болка во пределот на абдоменот каде што е црниот дроб
- замор
- губење на тежина, итн.
Меѓутоа, симптомите вообичаено се специфични за различни заболувања.
Камењата во жолчката се среќаваат почесто кај женската популација. Луѓето со зголемена телесна тежина и со високо ниво на холестерол во крвта се изложени на поголем ризик од камења во жолчката. Во најголем број случаи симптомите тешко се забележуваат, но може да ги издвоиме следните:
- болка во пределот на абдоменот каде што се наоѓа црниот дроб
- повраќање после обилен оброк
- висока температура (доколку жолчката се инфицира)
Цирозата е тешко заболување кое може да настане (но не мора) како резултат на хронична употреба на алкохол, иако тоа не е единствената причина. Цирозата може да се манифестира на повеќе начини:
- полесна појава на модринки по телото
- чешање
- губење на апетитот
- голем замор
- состојба на збунетост или безволност
- намалување на мускулното ткиво
- импотенција
- зголемени гради кај мажите
Замастен црн дроб е резултат на зголемено внесување на калории во организмот при што се јавува зголемен процент на масти во ткивото на црниот дроб. Замастен црн дроб може да се јави кај луѓето кои имаат зголемена телесна тежина или пак страдаат од шеќерна болест, но овие состојби не се предуслов кај сите луѓе. Вообичаено, за откривање на замастен црн дроб не постојат некои одредени симптоми, но ако болеста напредува може да се појават некои од следните знаци:
- изнемоштеност
- чувство на непријатност во абдоменот
- малаксаност
- покачен холестерол во крвта
Камењата во жолчката, цирозата и замастениот црн дроб се само дел од можните заболувања. Навременото откривање на проблемите со црниот дроб е од големо значење за вашето здравје. Грижете се за себе и обратете се на лекар доколку забележите некои од симптомите кои укажуваат на можни заболувања на црниот дроб.
