Дознајте неколку начини како да си помогнете при состојба на џетлег и избегнете ги најчестите грешки
Човековото тело не е создадено да патува долги релации со голема брзина. Доказ за ова е чувството на џетлег (jet lаg). Џетлег е нарушување на биолошкиот часовник, како последица од патување со авион низ повеќе временски зони, најчесто после меѓуконтинентални летови. Синдромот џетлег е пропратен со симптоми како умор, несоница, губење на апетит и раздразливост, и трае неколку денови по патувањето, односно сè додека телото не се навикне на новата средина. Во превод, тоа значи дека нема да бидете социјално прилагодени и може да ве избегуваат за време на ручекот, или пак ќе имате ширум отворени очи во 4 часот наутро. Исто така, честа заблуда е дека џетлегот се случува при секое патување, но оваа состојба зема замав доколку патувате преку најмалку две временски зони.
Три најчести грешки при справување со џетлег:
1. Планирате да спиете во авион
Лекарите советуваат дека периодот кога патувате до избраната дестинација не треба да го поминете во спиење, доколку на новото место во тоа време е ден. Наместо спиење, тоа време искористете го за релаксирање или работа. На тој начин ќе се подготвите и полесно ќе се прилагодите на различниот ритам. Исто така, не се советува да пиете апчиња за спиење. Тие се препорачуваат само доколку станува збор за лет над осум часа, во спротивно можат негативно да влијаат врз чувството на џетлег.
2. Гледате филм за да заспиете
Всушност, гледањето филм значително ќе ви го одложи сонот. Екраните емитуваат силна сина светлина која го збунува мозокот, бидејќи претставува имитирање на денската светлина, и на тој начин го прекинува природниот ритам.
3. Пиете алкохол за да се опуштите
Иако можеби ви изгледа добра идеја да се напиете коктел дури патувате, најдобро би било да го избегнете. Алкохолот го дехидрира организмот и може само да го влоши чувството на џетлег.
Три начини како да го преживеете џетлегот:
1. Наспијте се дома
Потрудете се да имате квалитетен сон ноќта пред патување. Тоа значи без брзање ден пред пат. Спакувајте се порано и избегнувајте подготовка во „5 до 12“. Најдобро е да се прилагодите на новото место уште од дома. Имено доколку патувате на исток, треба постепено да го поместувате времето за спиење порано, а доколку патувате на запад, треба да го поместувате одењето во кревет подоцна.
2. Прошетајте
Доколку пристигнете на дестинацијата за време на денот, колку и да сте уморни, прошетајте на кратко. Енергијата на новото место и локалното население, ќе ви дадат енергија и ќе имате чувство дека не сте целосен странец. Дневната светлина и воздухот подобро ќе ве разбудат и расположат, отколку кафе.
3. Хидратирајте се
Симптомите на џетлег: главоболки, мачнини и вртоглавици, се слични како оние за време на дехидрација, па доколку не пиете доволно вода, овие симптоми ќе се интензивираат. Избегнувајте алкохол и кафе, и воопшто, избегнувајте внесување на кофеин. Исто така, кога сте дехидрирани, тогаш сте и поспани и не можете нормално да функционирате.
