Симптоми на т.н. ‘’морска болест’’
Во пролетно-летниот период значајно се зголемува бројот на патувања. Иако патувањето во фамилијарно опкружување, генерално е извор на убави спомени, честопати истото знае да се претвори во кошмар особено за децата кои имаат напади на т.н. ‘’морска болест’’ (болест на движење) и секако нивните родители. Овие состојби најчесто се случуваат на задното седиште на автомобилите во движење, при немирни летови, возење со брод, автобус или воз, а пред се кај популацијата на деца од 2 до 12 години, што делумно може да се должи на недоразвиениот вестибуларени систем кој е поподложен на нерамнотежа. Проблемот почесто се јавува кај жените отколку кај мажите. Непријатните симптоми вклучуваат: гадење, главоболка, вртоглавица, поспаност, премаленост и друго. Децата може да станат бледи и испотени, невообичаено тивки, сакаат да ги отворат прозорците, имаат желба да легнат или да ги затворат очите, почнуваат да дишат побрзо, стануваат немирни и на крајот се завршува со повраќање.
Како да ја превенираме мачнината при патувањата?
Постојат повеќе мерки што можете да ги преземете за да ја спречите појавата на мачнина при патувањата или барем да ги минимизирате симптомите:
Возете додека детето спие, и правете повеќе паузи по потреба.
Обидете се да ги планирате вашите патувања со автомобил за време на неговото спиење, бидејќи спиењето може да помогне. Важно е температурата во автомобилот да не биде многу висока а организацијата на патувањето да вклучува повеќе планирани паузи за време на кои ќе се ‘’ресетира’’ мачнината.
Изберете најпогодно седиште каде има најмало движење
Во автомобил одберете го предното совозачко седиште (за оние постари од 12 години). При патување со брод тоа е долната палуба и кабините на средината на бродот. Во авион најдобро е седиште до прозорец над предниот раб на крилото. Ако патувате со воз или автобус, се претпочитаат седишта свртени кон напред.
Охрабрете го детето да гледа низ прозорецот
Гледањето низ прозорецот може да помогне да се избегне чувството на гадење. Детето треба да седи ‘’колку што може повисоко“ и да има чист поглед низ прозорецот. Избегнувајте нагли промени на положбата на телото, особено на главата. Замолете го возачот да кочи повнимателно и да не забрзува и забавува нагло.
Не читајте и не гледајте во таблет или во мобилен телефон додека патувате.
Во вакви случаи внатрешното уво и рецепторите на кожата ќе детектираат дека се движите нанапред, но очите кои се насочени во стабилната книга/таблет ќе му пренесат на мозокот дека не се движите. Во таков случај, во мозокот доаѓа до судир на различни информации и често се јавува мачнина.
Не гледајте во друга личност којашто има мачнина и не разговарајте со неа.
Ослободете се од силните миризби и обезбедете доволен проток на чист воздух.
Подобро е да нема освежувач на воздухот во автомобилот, отколку дополнително да ве иритира неговата силна арома. Се подразбира и дека не треба се пуши во автомобилот! Од друга страна ако автомобилот не се движи со голема брзина отворете го прозорецот за да влегува чист воздух. Ако патувате со брод и ако временските услови се погодни излезете на палубата и гледајте во далечината.
Земање длабок здив
Понекогаш не можете да излезете од превозното средство. Во таква ситуација е корисно да се забави дишењето што ќе помогне да се намалат гадењето и анксиозноста поврзана со болеста при движење. Ова може да се направи со земање длабок здив или дишење во кеса.
Не јадете тешка храна пред и за време на патувањето.
За да го избегнете гадењето и повраќањето, пред патувањето не треба да јадете обилен оброк составен од пржена, масна и зачинета храна. Наместо тоа каснете суви крекери кои се најдобар избор на храна за пред патување.
Користете гума за џвакање.
Ментолот ќе ви помогне да се освежите, а се смета дека движењето со устата го намалува гадењето и ја намалува потребата за повраќање.
Терапија против мачнина при патување
Одредени природни производи како што е е ѓумбирот помагаат за намалување на гадењето. Освен за мачнина при патување, тој се препорачува и за утринската мачнина кај бремените жени. Можете да се консумира во форма на чај а за децата го има и во форма на лижавчиња. Корисна традиционална билка за надминување на стомачните тегоби е секако и нането.
Освен тоа и употреба на лимон помага за намалување на чувството на гадење па затоа на луѓето кои имаат мачнина им се препорачува да стават парче лимон во устата.
Доколку овие природни состојки не помагаат постојат повеќе лекови кои можат да ви помогнат да ја избегнете мачнината. Кај децата над 2 години и постарите најчесто се користат антихистаминици. Повеќето од нив предизвикуваат поспаност, па оние кои ги земаат, најчесто го преспиваат патувањето што е олеснителна околност.
