Благодарение на овој интернационален настан се обезбедуваат нови активни крводарители и доволно безбедна крв, што може да се употребува во секое време и секаде каде што е потребна
Светскиот ден на крводарувањето е интернационален настан кој се одбележува на 14 јуни секоја година, благодарение на редовните крводарители. Овој настан има цел да ја подигне свеста за потребата од доброволно дарување крв, свеста за хуманоста и спасувањето човечки животи и да охрабри, поттикне и измотивира што е можно повеќе луѓе да започнат со овој благороден чин. Со тоа ќе се создадат нови генерации на крводарители и ќе се одржат и зголемат неопходните резерви на крв ширум светот, со што е можно побезбедна крв за да се спасуваат животи. Светскиот крводарителски ден е можност за интернационалните организации да се соединат за да ја поддржат безбедната донација на крв. Во европскиот регион овој хуман настан е масовно прославуван.
Првиот настан од овој тип беше одржан во 2004 година во Јоханесбург, Јужна Африка, а секоја година домаќин на овој глобален настан е различен регион од Светската здравствена организација. Оваа година домаќин на настанот беше Шангајскиот центар за крв во Шангај, Кина, кој исто така е соработувачки центар за трансфузија на крв со СЗО. Мотото на овогодинешната кампања гласи: „Ти благодарам што ми го спаси животот“, а слоганот за охрабрување на донаторите гласи: „Дарувај бесплатно, дарувај често. Дарувањето крв е важно“.
„Најдобар начин за гарантирање на безбедна и соодветна резерва на крв и крвни продукти за трансфузија е да се има добра резерва на редовни дарувања од страна на доброволните неплатени крводарители“ – рече генералниот директор на СЗО Д-р Маргарет Чан – Margaret Chan. „СЗО ги охрабрува сите членки да ги обезбедуваат сите нивни крвни залихи токму од такви донатори“ – додаде таа.
Трансфузијата на крв и крвни продукти (плазма, еритроцити, леукоцити и тн.) е најпотребна за време на операции и медицински интервенции, при сообраќајни несреќи и други несреќи (од човечка природа, како и природни катастрофи) при кои се губи големо количество крв, при обилните крварења за време на бременоста или пак, раѓањето, потоа им помага на пациентите кои страдаат од состојби и заболувања опасни по живот (на пример дисфункција на бубрези), да живеат подолго и да имаат подобар квалитет на живот.
Пристапот до доволна количина на безбедна крв и крвни продукти, како и безбедната и рационална трансфузија на крв, сè уште претставува голем предизвик и проблем во многу држави во светот. Благодарение на Светскиот ден за крводарување, како и останатите крводарителски акции во текот на годината насекаде во светот, обезбедуваат нови активни крводарители и доволно безбедна крв, што може да се употребува во секое време и секаде каде што е потребна.
Регрутирањето на нови дарители на крв, не само што ги зголемува резервите на сигурна крв и обезбедува постојани снабдувачи, тоа исто така промовира безбеден и здрав начин на живот. Имено за да се биде дарител, пред сè треба да се биде здрав, па секој кој сака да спасува туѓи животи најпрво мора да се грижи за своето здравје, со здрава исхрана богата со железо и спорт. Доколку редовно дарувате крв (мажите смеат 4 пати во годината на 3 месеци, а жените 3 пати во годината на 4 месеци), вие автоматски знаете дека немате анемија и дека хемоглобинот ви е на соодветното ниво, но исто така знаете дека во ред ви е крвниот притисок итн. – едноставно знаете дека сте здрав/а и во добра форма. Доколку за време на редовното доброволно дарување крв сте одбиени, тоа вие бесплатен показател дека нешто со вашето здравје не е во ред и дека треба да направите понатамошни испитувања или пак, да промените или подобрите нешто во својот животен стил.
Доколку не може да донирате крв, донирајте го своето време
Како активен доброволен крводарител, кој до сега има дарено крв 20 пати, ги охрабрувам сите да го следат мојот пример и да започнат да се грижат за себе и да спасуваат животи. Не мора да чекате крводарителска акција, туку слободно може да се упатите во најблискиот крводарителски пункт. Не е страшно, не е тешко, не е временски долго, воопшто не боли и ништо не може да го замени хуманото чувство по дарувањето.
Доколку сте спречени да дарувате поради одредени причини или здравствени проблеми – не се обесхрабрувајте, бидејќи секогаш може да донирате дел од своето слободно време како волонтер за време на некоја крводарителска акција.
