Уште една добра причина да се мотивирате да започнете со вежбање уште денес
Одамна е познато и потврдено дека редовното вежбање значи добро здравје и подолг живот. Физичката активност не само што го прави телото фит, туку во исто време го стимулира и мозокот и ве прави да се чувствувате посамоуверено и секси. Ричард Котон – Richard Cotton, фитнес физиолог, вели дека врската помеѓу сексот и вежбањето е логична, бидејќи трите главни компоненти на вежбањето: издржливост, сила и флексибилност, многу придонесуваат за квалитетен сексуален однос. Исто така, доколку сте во форма, помали се шансите да се случи повреда при сексуалниот чин, како на пример истегнување на мускул.
Вежбањето ја зголемува самодовербата
Сексуалната активност колку што е физичка, толку е и ментална, па така, квалитетниот сексуален живот подразбира и високо ниво на самодоверба. Ова тврдење е научно докажано со едно истражување од 2008 година, кога волонтерите кои имале проблеми со самодовербата се изјасниле дека имаат проблематични сексуални односи. Со други зборови, колку помала самодоверба, толку помалку сексуално уживање.
Вежбањето ја подобрува циркулацијата и крвотокот
Лекарите тврдат дека сексуалното задоволство многу зависи од протокот на крв низ целиот организам. Кога телото е во фаза на возбудување, еректилните ткива се полнат со крв, па за целосна генитална возбуда, неопходна е добра циркулација.
Вежбањето го намалува стресот
Вежбањето го учи телото како да се соочи со стресот (преку забрзано срцебиење, брзо и тешко дишење но без присуство на вознемиреност и грижи), а помал стрес значи поголема релаксираност. Тоа значи дека ви останува повеќе енергија за други активности. Исто така, правилното дишење кое што се стекнува со редовни физички вежби, е неопходно за квалитетен сексуален однос.
Вежбите ги зајакнуваат мускулите
Одредени вежби зајакнуваат групи на мускули кои што го зголемуваат интензитетот на оргазмот. Најпопуларни вакви вежби се кегелови вежби, како и клекнувањата кои што ангажираат голем број на мускулни групи. Важно е да се нагласи дека за да се почувствуваат предностите од вежбањето, треба да се вежба посветено и континуирано, без очекување на брзи резултати. Фитнес програми погодни за жените, односно за зацврстување на целото тело се пилатесот и јогата.
Еуфорија после вежбање
Чувството на еуфорија после физичка активност е благодарејќи на ослободувањето ендорфин, таканаречен природен „ослободувач“ од болка и на хормони кои што се поврзани со производство на секс хормони. Исто така, вежбањето го зголемува тестостеронот кој ја поттикнува сексуалната желба.
