Прва посета на гинеколог

Што треба да знаете при вашата прва посета на гинеколог

Се смета дека тинејџерите денес се доста информирани во сите области, вклучувајќи го и нивното сексуално здравје. Меѓутоа резултатите од праксата покажуваат нешто друго. Имено, доколку отворите форум каде што тинејџери поставуваат прашања поврзани со оваа проблематика, набргу ќе увидите дека нивното знаење е исполнето со многу заблуди и погрешни информации. Затоа, родителите треба навреме да разговараат со своите деца за сè што ги интересира а е поврзано со сексуалното здравје, и што е најважно, да ги научат да не се срамат од своето тело, или да постават прашања што ги интересираат. Само на тој начин се формираат психички и физички здрави тинејџери.

Подготовка пред посетата на гинеколог

Прва посета на гинеколог се препорачува после 16-тата година, или по 18-тата година. Посетата е задолжителна доколку сте веќе сексуално активни или планирате да бидете во скоро време.

Исто така, посетата е задолжителна и доколку имате 18 години, а сè уште немате добиено прва менструација. Не е потребна некоја особена подготовка при првата посета на гинеколог. Бидејќи времето предвидено за преглед најчесто е кратко, претходно составете список од прашања што ве интересираат, како и податоци за фамилијарната историја. Запомнете дека не постојат непотребни или глупави прашања кога станува збор за вашето здравје.

Посета на гинеколог

Посетата на гинеколог не секогаш значи и гинеколошки преглед, особено доколку не сте сексуално активни.

Посетата започнува со разговор, па затоа доколку сте во придружба на родител, гинекологот ќе инсистира овој разговор да биде исклучиво помеѓу вас. Оваа одлука на гинекологот е со цел да добие најточни информации од вас, со поставување на прашања на кои би ви било незгодно да одговорите во присуство на родителот.

Гинеколошки преглед, значи преглед со спекулум и правење на ПАП тест. За време на прегледот, запомнете да дишете длабоко и бавно за да се отпуштите. Не го стегајте телото, бидејќи доколку сте во грч, прегледот ќе ви биде непријатен. Освен овој преглед, гинекологот може да направи и општ физички преглед, кој вклучува проверка на гради, проверка на вратот за да ја види состојбата на тироидната жлезда и вагинален преглед со палпација.

При првата посета на гинеколог, доколку не сте сексуално активни, немате никакви болки и имате редовна менструација, прегледот на гинеколог може да се состои и од информативен разговор за вашето здравје, сексуално преносливи болести, грижа за телото, употреба на кондом и слични теми. Она што е најважно, е да имате доверба во вашиот гинеколог.

Потребно е да бидете целосно искрени, бидејќи секој податок е важен и може да влијае врз вашето сексуално здравје.