Викендов се одржува трет по ред семинар за демистификација на конопот
Здружението на граѓани „Зелена Алтернатива“, овој викенд, ќе организира трет по ред семинар, од циклусот за демистификација на конопот. Учесници на семинарот ќе бидат научници и доктори од Израел, Чешка, Шпанија, Канада, признаени како светски експерти на полето на канабисот. Голем дел од нив се членови на интернационални одбори на истражувачки центри и асоцијации за употребата на конопот. Тие ќе ги презентираат најновите сознанија од областа на употребата на канабисот и ќе ги споделат искуствата од нивната работа, како и истражувањата за лековитоста на конопот.
Водечка тема на овој семинар ќе биде употребата на канабисот во здравствената заштита, теорија и пракса. Ќе се одржи на 28-ми и 29-ти мај во Дом на АРМ во Скопје со почеток во 12 часот. Влезот е бесплатен.
„Со оглед на сé поголемиот број на граѓани на нашата држава кои го користат маслото од канабис, како здружение сметаме дека овој семинар ќе помогне да допреме до што повеќе граѓани и ќе допринесе за поголема едукација за тоа како правилно да се користи конопот. Со оглед на сé почестите заболувања на наши и ваши роднини, пријатели и познаници, веруваме дека на сé повеќе луѓе им е потребно маслото од канабис како за спречување и превенција, така и за лекување на повеќе болести и тегоби на ова модерно време.“, пишува на страницата на здружението „Зелена Алтернатива“.
