За да бидете физички активни не ви е потребна членарина бидејќи доколку навистина сте решени да вежбате, тоа можете да го правите и во удобноста на вашиот дом
Живееме во време на „кауч култура“ кога е потребна голема мотивација и напор за да се започне со вежбање самоиницијативно и индивидуално. На повеќето ентузијасти, напорите со вежбањето им престануваат откако ќе платат членарина и ќе ја посетат еднаш до два пати во месецот. Ова секако не се однесува на оние кои што се постојано физички активни или спортистите, бидејќи ним вежбањето им е начин на живот. Останатите се некаде помеѓу удобниот кауч и салата за вежбање, но повеќето се навалуваат кон полесната опција, креветот. Но знаете што? За вежбање не е задолжително да се напушти удобниот дом, бидејќи можете да вежбате од дома. Потребна ви е само мотивација и желба за промена.
Тајната за бесплатно да бидете фит, е да ја користите секоја можност да бидете активни.
Постојат многу предности од вежбање во домашни услови, но секако и недостатоци.
Недостатоци:
- Не сте под професионален надзор;
- Вниманието може лесно да се одвлече бидејќи на дофат ви се компјутерот, телефонот и фрижидерот. Да не исклучиме и можност за ненајавена посета кога ќе морате да го прескокнете планираното вежбање;
- Немате доволно инспирација бидејќи немате со кој да се споредувате.
Предности:
Не трошите пари и време
Членарината може да биде скапа, а исто така не треба да вложувате во облека и дополнителна опрема, бидејќи за дома ви е доволна само простирка за јога и можеби тегови.
Разновидност на фитнес програми
На интернет се достапни многу фитнес програми, треба само добро да истражите и да го пронајдете она што го сакате. А тоа ќе го постигнете со тоа што најпрво ќе одредите што сакате да промените кај себе, односно, дали сакате да се зацврстите, да слабеете или да имате мускули. Без оглед дали вашиот избор ќе биде аеробик, зумба, P90X, јога или пилатес, внимавајте вежбите да започнат со загревање, аеробни вежби, вежби за зацврстување, вежби за флексибилност и истегнување.
Модерирање и прилагодување
Доколку сте почетник, можете да започнете со 30 минути кадрио вежби, три пати неделно. Доколку немате време или кондиција, можете да вежбате секој ден по 10 минути, сè зависи од вашата ангажираност и посветеност. Исто така, вежбате вие кога ќе посакате и кога ви одговара, наутро или навечер.
Комбинирање со активности на отворено
Вежбањето дома можете да го комбинирате со трчање на отворено што претставува уште една активност која што е бесплатна. Пешачење, планинарење и возење велосипед се исто така одлични активности на отворено.
