Екстрактот од спанаќ го намалува гладот и желбата за храна
Спанаќот е храна број еден доколку сакате здраво да се храните. Многу е хранлив и може да се консумира во текот на целата година. Има ниска енергетска вредност и е богат со минерали и витамини. Го подобрува имунитетот бидејќи содржи голема количина на витамин Ц. Исто така, содржи и диететски влакна корисни за подобро варење на храната а претставува и моќен извор на фолна киселина која продуцира црвени крвни зрнца, а е особено корисна за време на бременоста. Тој е и моќен антиоксиданс и зеленчук што содржи големи количества на железо и магнезиум.
Постојат бројни истражувања за спанаќот и придобивките од неговото консумирање. Некои од нив се дека спанаќот штити од рак на простата, го враќа видот и го зголемува производството на мускулни протеини за 20 проценти.
Најновата вест за бенефитот од спанаќот, доаѓа од Journal of the American College of Nutrition, и објаснува за истражувањето кое се состоело од испитување на концентриран екстракт од тилакоид – thylakoids, кој што се наоѓа во спанаќот и кој природно го намалува гладот и дава чувство на ситост.
Тим од медицински истражувачи и нутриционисти го мереле субјективното чувство на ситост и внес на храна после една доза од thylakoids, добиен од екстракт од листот на спанаќот, споредувајќи го со другата група на кои им било дадено плацебо. Во истражувањето, учествувале 60 волонтери (30 мажи и 30 жени), кои имале прекумерна телесна тежина. На половината од нив им бил додаден екстрактот од спанаќ во нивната секојдневна исхрана, додека на другите им бил вметнат плацебо.
Се испитувале гладот, потребата за храна, ситоста, жедта, како и потребата за благо и солено. Преку земање на крв се испитувало нивото на масти и шеќер пред вообичаениот појадок, и по четири часа им се давало 5 грама од екстрактот од спанаќ пред ручекот. Со повеќе различни мерки бил постојано испитуван апетитот како и чувството за ситост.
Споредено со плацебо, консумирањето на екстрактот од спанаќ значително го намалил гладот и потребата за храна за преку 2 часа. Не биле забележани особени разлики во зголемување на плазма липидите, и немало зголемување на енергијата споредени со другата група.
Со намалувањето на желбата за храна, како и намалување на потребата за внес на солена храна со помош на екстрактот од спанаќ, ова истражување е особено корисно за групата на луѓе кои патат од разни проблеми поврзани со дебелината како и оние кои патат од зголемен крвен притисок.
