Според една нова научна студија, децата родени во лето поверојатно е дека ќе бидат поздрави кога ќе пораснат. Студијата не е поврзана со астрологија
Според една нова контроверзна научна студија од Медицинската истражувачко-советодавна епидемиолошка единица од Универзитетот во Кембриџ во Англија – University of Cambridge’s Medical Research Council Epidemiology Unit in England, луѓето кои се родени во лето се поздрави. Студијата објавена кон крајот на 2015 година, во зборникот Heliyon, покажа дека кај луѓето родени во јуни, јули и август, помала е веројатноста да имаат ниска родилна тежина, рано да влезат во пубертет или да бидат со низок раст. „Сите тие се показатели на растот и развојот што биле асоцирани со поголемите ризици на болести кај возрасните. Јас се надевам дека на луѓето ќе им биде фасцинантно тоа дека настаните на почетокот на животот може да имаат многу долготрајни придобивки“ – изјави д-р Кен Онг – Ken Ong за „Д Хафингтон Пост“, кој е педијатриски ендокринолог и коавтор на студијата.
Ова истражување ја поддржува хипотезата наречена „фетално програмирање“. Оваа теорија се состои од тоа што средината во матката на мајката може да врши големо влијание врз здравјето и развојот на бебето подоцна во животот. За оваа студија, истражувачите ги споредиле здравствените статистики од 450 илјади мажи и жени регистрирани во Британската Биобанка – база на податоци за висината, тежината, когнитивната функција и други параметри.
Кога истражувачите ги организирале податоците според датата на раѓање, тие забележале дека мажите и жените родени во летните месеци, имале тенденција да тежат повеќе за време на раѓањето и да пораснат во повисоки возрасни личности.
Децата родени во летните месеци имаат тенденција да бидат поздрави.
„Ова е прв пат кога времето на пубертетот е силно поврзано со сезоната.Ние бевме изненадени и задоволни да видиме колку беа слични моделите на родилна тежина и времето на пубертетот“ – рече д-р Џон Пери – John Perry, виш истражувач научник од Одделот за епидемиологија и главен автор на студијата.
Која е врската помеѓу датата на раѓање и здравјето?
Научниците сè уште не се сигурни. Тие сметаат дека една од можностите за оваа појава е фактот што мајките на бебињата родени во лето најверојатно имаат повисоки нивоа на витаминот Д, кој е познат по неговото влијание врз растот и развојот. Изложеноста на сончева светлина го предизвикува телото да синтетизира витамин Д, што влијае на средината во матката (фетално програмирање). Во северната хемисфера постои поголема тенденција да има повеќе сончева светлина во летните месеци. „Добро познато е дека многу бремени жени не постигнуваат доволни дози на витамин Д“ – вели д-р Онг.
„Она што (тоа) ни го кажува не се однесува на тоа кога ние треба да имаме бебиња, но на она што придонесува (за здравјето) во животната средина. Ефектите на месецот на раѓање се речиси мали во споредба со работите што можат да се контролираат“ – објаснува д-р Николас Татонети – Nicholas Tatonetti, доцент по биомедицинска информатика од Универзитетот во Колумбија кој не бил вклучен во студијата. Друга можна претпоставка за поврзаноста на датата на раѓање и понатамошното здравје на бебето можеби е и фактот што летото со себе носи позитивна еуфорија и тоа е период од годината што ги прави луѓето посреќни, за разлика од депресивните зимски и есенски месеци.
Сонцето е лек против анксиозност и депресија и идните мајки ги расположува, ги полни со хормоните на среќа, а ги ослободува од стрес. Па, на тој начин и нивните деца се посреќни и имаат појак имунитет.
Наодите од Кембриџ се чини дека ги зајакнуваат другите поранешни докази за поврзаноста помеѓу датата на раѓање и здравјето. Во јуни, научниците од Медицинскиот центар на Универзитетот во Колумбија најдоа поврзаност помеѓу месецот на раѓање на личноста и ризикот од појава на срцево заболување, инфекции и други проблеми поврзани со зрелоста на кои се изложени.
