sto-se-treba-da-znaete-za-bademovoto-mleko_image
Споделете со пријателите!

Една алтернатива за кравјото млеко е бадемовото млеко коешто содржи помалку калории од останатите млека
Секој тип млеко има свои предности и недостатоци за нашето здравје, во зависност од индивидуалните начини на исхрана, здравје и нутриционистички потреби. Децата поголеми од две години, тинејџерите и бремените жени, на пример, имаат потреба од внесување на големо количество протеини, витамин Д и калциум во организмот – материи содржани во кравјото млеко.

„Бадемовото млеко е замена за кравјото за оние коишто треба да внимаваат на внесување на калории и заситени масти“

Од друга страна, луѓето коишто од различни причини треба да внимаваат на секојдневното внесување на калории и заситени масти во организмот, би требало да бараат соодветна замена за кравјото млеко. Една алтернатива за кравјото млеко е бадемовото млеко коешто содржи помалку калории од останатите млека воопшто, но само кога не е дополнително засладувано. Бадемовото млеко, исто така, не содржи заситени масти.

Нутриционистички факти за бадемите и бадемовото млеко

Бадемовото млеко ги содржи речиси истите хранливи материи како и бадемите, меѓу кои витаминот Е и витаминот Б2, но генерално нутриционистичките придобивки од него се помали отколку од бадемите.

Имено, околу 23 бадеми содржат 6 г протеини и 4 г растителни влакна, витамин Е, витамин Б2, магнезиум, калциум и калиум.

Бадемовото млеко се прави од мелени бадеми и вода. Во зависност од брендот којшто го прозведува млекото, процентот на бадеми којшто е содржан во млекото честопати е различен, но несомнено станува збор за мал процент. Еден пример е бадемовото млеко на британскиот бренд „Alpro“ коешто содржи само 2% бадеми. Настрана од овие 2%, бадемовото млеко на „Alpro“ во својот состав има вода и додадени витамини, минерали и згуснувачи. Оттука, кога станува збор дали е подобро да се јадат сурови бадеми или да се пие бадемово млеко, од фондацијата „The George Mateljan Foundation’s World’s Healthiest Foods“ советуваат дека суровите бадеми имаат поголеми нутриционистички предности отколку млекото.

Прочитајте:  Корисноста и широката примена на лененото семе

Разлики помеѓу кравјото и бадемовото млеко

Една значајна разлика помеѓу кравјото и бадемовото млеко е тоа што бадемовото млеко не содржи холестерол и заситени масти, додека кравјото млеко ги содржи истите коишто варираат во зависност од типот на млеко и брендот којшто го произведува.

Кравјо млеко

Кравјото млеко е полно со природни протеини, масти и калциум. Една шолја полномасно кравјо млеко содржи:

  • 150 калории;
  • 12 г јаглехидрати во форма на лактоза;
  • 8 г масти;
  • 8 г протеини.

sto-se-treba-da-znaete-za-bademovoto-mleko_image1

Бадемово млеко

Бадемовото млеко се прави од мелени бадеми и филтрирана вода. Некои бадемови млека содржат скроб и згуснувачи со цел да се подобри нивната густина и долготрајност. Една шолја несласладено бадемово млеко содржи:

  • од 30 до 60 калории;
  • 1 г јаглехидрати (засладените бадемови млека содржат повеќе);
  • 3 г масти;
  • 1 г протеини. 

Како да приготвите домашно бадемово млеко

„Еден начин да се задржи природното ниво на витаминот Е од бадемите во млекото е домашно приготвување“

Според фондацијата „The George Mateljan Foundation’s World’s Healthiest Foods“, бадемовото млеко содржи поголемо количество на калциум и витамин А и Д отколку суровите бадеми, но само заради тоа што производителите го надополнуваат млекото со истите хранливи материи. Дополнително, количеството на витаминот Е е исто така дополнително засилен во купечките бадемови млека бидејќи природното ниво на витаминот Е во фабричкиот процес на правење на млекото се намалува. Еден начин да се задржи природното ниво на витаминот Е од бадемите во млекото е домашно приготвување на истото.

Потребни состојки:

  • 1 шолја излупени бадеми;
  • 3 шолји вода;
  • 1 супена лажица мед;
  • 1 кафена лажица екстракт од ванила;
  • неколку зрна кошер сол. 

Начин на подготовка

Ставете ги излупените бадеми во сад и покријте ги со вода. Оставете ги на собна температува од 1 до 12 часа. Исцедете ги и процедете ги бадемите, а потоа измешајте ги со останатите состојки (3 шолји вода, ванила и сол) во блендер. Изблендирајте ја смесата сè додека не се соедини (околу 2 мин).


Споделете со пријателите!