Нови истражувања докажуваат дека полномаслениот кашкавал го подобрува човековото здравје и го штити од кардиоваскуларни заболувања
„Многумина сметаат дека намалувањето на прекумерната тежина или непосакуваните вишок килограми се тесно поврзани со млечните производи бидејќи содржат високо ниво на масти. Оттука, најчесто практикуваат диети во коишто целосно ги отфрлаат млечните производи“ – вели проф. Делфос од Универзитетот за Технологија во Перт, Австралија. Ново истражување спроведено од група професионалци од Универзитетот во Копенхаген, докажа дека полномаслениот кашкавал може да помогне во подобрување на здравјето на човекот.
Всушност, станува збор за подобрување на здравјето преку зголемување на нивото на „добриот“ ХДЛ холестерол во крвта што делува како заштита од кардиоваскуларни и метаболични заболувања.
Предмет на дванаесет-неделното истражување биле вкупно 139 возрасни луѓе коишто биле поделени во три групи на кои им била зададена различна задача. Појдовната цел на истражувањето била да се открие како високомаслениот кашкавал влијае на човековото здравје, во секоја група поединечно. Оттука, првата група имала за задача секој ден да јаде 80 г полномаслен кашкавал, втората група да јаде 80 г кашкавал со намалена масленост, додека третата група наместо кашкавал, секој ден да јаде 90 г леб со џем.
Резултатите од дванаесет-неделното истражување, прикажани во Американскиот весник „American Journal of Clinical Nutrition“, сведочат за следните промени кај испитаниците – кај ниедна од трите различни групи на испитаници не се забележани промени во нивото на „лошиот“ ЛДЛ холестерол во крвта, напротив, кај првата група испитаници што имала за задача да јаде полномаслен кашкавал е забележано зголемено ниво на „добриот“ ХДЛ холестерол во крвта.
Ова истражување не е помеѓу првите во светот што докажуваат дека кашкавалот е всушност, добар за здравјето на човекот. Имено, неодамнешна студија во Јапонија дозна дека консумацијата на кашкавал го спречува акумулирањето/насобирањето на маснотии во црниот дроб, како и дека има потенцијал да ги подобри параметрите на липидите во организмот, коишто се клучни за откривање на ризикот за кардиоваскуларни болести.
Во меѓувреме, друго научно истражување од 2015 година, испита дека кашкавалот може да биде клучниот елемент за забрзувањето на метаболизмот, како и за намалувањето на прекумерната тежина кај човекот.
Станува збор за научното истражување на данската научничка за храна, Хане Бертрам, спроведено на Универзитетот во Орхус. Во ова истражување, предмет на испитување биле примероци од урина и фекалии на 15 мажи коишто воделе диети што вклучувале кашкавал или млеко и диети што вклучувале само путер и ниеден друг млечен производ. Преку ова истражување, Бертрам открива дека оние коишто јаделе кашкавал имале зголемено ниво на бутерна киселина, соединение што помага во намалувањето на тежината и на холестеролот, како и за забрзувањето на метаболизмот.
Исто така, уште едно истражување од 2012 година докажа дека токму францускиот син кашкавал „Roquefort“ помага во намалувањето на ризикот од кардиоваскуларни заболувања, додека истражување од 2009-та спроведено во Австралија докажа дека диета во која преовладуваат млечните производи, помеѓу кои и кашкавалот, може да им помогне на луѓето со прекумерна тежина полесно да го отстранат високот килограми.
Испитаниците, коишто доброволно пристапиле да бидат предмет на истражување, биле ставени на нискокалорични диети, но на дел од нив им била дадена задача да јадат повеќе кашкавал и да пијат јогурт и нискомаслено млеко. На крајот, кај онаа група испитаници што ја зголемиле дневната консумација на млечни производи е забележано значително намалување на тежината и на крвиот притисок, како и значително намалување на ризикот од срцеви заболувања и дијабетес.
