Дали сте спремни за патување?
Многу жени во текот на бременоста сакаат да патуваат и често тоа го прават без да се консултираат со својот доктор. Во зависност од текот на бременоста, годишното време, како и целокупното здравје на жената, докторот може да не го одобри патувањето или да го одобри патувањето. Во секој случај, се препорачува да направите дополнително планирање и да преземете неколку дополнителни мерки на претпазливост. Оттука, не заборавајте да ги направите следниве 5 работи пред да тргнете на патување.
Консултирајте се со вашиот лекар
Вашиот доктор можеби ќе ви каже дека средината на бременоста е најбезбедна за патување, бидејќи повеќето итни случаи се случуваат во првото и последното тримесечје. Сепак, прашајте го вашиот доктор дали има какви било медицински загрижености за кои треба да знаете или тестови коишто треба да ги направите пред да заминете на пат.
Жените со ризични бремености треба да бидат многу попретпазливи за разлика од оние што имаат нормална бременост. Но без разлика на тоа во која група сте, без сомнение е важно да се консултирате со вашиот доктор пред планирањето на било какво патување бидејќи докторот може да не го одобри патувањето заради многу причини. Меѓудругото, во зависност од тоа каде сакате да патувате, може да ви биде потребна вакцина која не е безбедна за време на бременоста, што исто така може да го спречи планираното патување.
Соберете ги потребните медицински податоци и важни информации за вашето здравје
Пред да заминете, подгответе листа на клучни имиња и телефонски броеви што ќе ви бидат потребни во случај на итност за време на патувањето. Бидете сигурни дека тие се зачувани во вашиот телефон, но и дека имате хартиена копија од нив во случај вашиот телефон да се изгуби или да остане нефункционален во моментот кога би требале итно да контактирате некого.
Ако сте во второто или третото тримесечје од бременоста, прашајте го вашиот доктор за копија од вашиот здравствен картон за да го понесете со вас. Чувајте го со вас во секое време додека трае патувањето. Вообичаено, во здравствениот картон се вбројуваат важни лични податоци, како возраст, крвна група, информациите за контакт за вашиот давател на здравствена заштита, датумот на последниот менструален циклус, датумот за породување, информации за претходна бременост, вашата медицинска и хируршка историја и евиденција на резултати од секоја посета на доктор.
Исто така, ако планирате подолго патување, не заборавјате да истражите каде е најблиската болница за прегледи или итни случаи.
Бидете сигурни дека сте ги понеле сите лекови кои ви се потребни
Спакувајте доволна количина на лекови на рецепт, пренатални витамини, како и лекови што може да ви бидат потребни за време на вашето патување – особено ако одите на место каде што тие лекови не се достапни. Понесете доволно лекови за да го покриете целото патување и писмен рецепт што можете да го користите доколку ви треба надополнување од некој лек.
Проверете го здравственото осигурување
Проверете дали вашето здравствено осигурување ги покрива компликациите за бременост за време на патувањето до вашите планирани дестинации, особено доколку тие вклучуваат странски земји. Доколку не ги покрива, препорачливо е да купите дополнително осигурување.
Ако патувате со авион проверете ги правилата авиокомпанијата
Многу авиокомпании не дозволуваат бремените жени да летаат во текот на последната недела или месец од бременоста без потврда од медицинско лице. Настрана од правилата на авиокомпаниите, повеќето даватели на здравствени услуги не го поддржуваат патувањето по 36та седмица, освен доколку тоа е неопходно. Оттука е многу важно пред заминувањето да ги проверите правилата за летање од авиокомпанијата и да понесете потврда од доктор доколку тоа е потребно.
