Повеќето од луѓето знаат што се хемороиди но ретко кој знае како да се лекуваат
Хемороидите најчесто не се многу опасни, но знаат да предизвикаат болка, чешање, крварење и останати непријатности. За среќа, постојат начини на кои можеме да се справиме со нив.
Што се всушност хемороиди?
Хемороидите се проширени и отечени вени што се наоѓаат во најдолниот дел на ректумот и аналниот отвор. Постојат два вида на хемороиди: внатрешни и надворешни. Внатрешните хемороиди се појавуваат во долниот дел на ректумот и најчесто се безболни.
Внатрешните хемороиди можат да предизвикаат крварење кое вие би го забележале како светло црвена крв на тоалетната хартија или во шолјата.
Овие хемороиди може да се спуштат и да се прошират преку аналниот отвор, и на тој начин да предизвикаат дополнителни проблеми. Надворешните пак, се појавуваат под кожата околу аналниот отвор. Можете да ги почувствувате или да видите нешто слично како израсток околу анусот. Овој тип предизвикува повеќе непријатности затоа што кожата околу анусот може да се иритира и да испука.
Која е причината за појава на хемороиди?
Хемороидите се појавуваат како резултат на неколку причини: хронична тврда столица, долго време поминато во седечка положба или напрегање при празнење на цревата. Сето ова влијае врз протокот на крв и може да предизвика проширување и отекување на вените, односно појава на хемороиди. Доколку имате тврда столица се очекува да постои зголемено напрегање при празнење на цревата, а ова може да ги притиска хемороидите кон сфинктерот и дополнително да ја влоши нивната состојба. Хемороидите можат да се дијагностицираат преку обичен преглед. Надворешните хемороиди се забележливи со голо око.
Како се лекуваат хемороидите?
Еве што можете да направите за да ја подобрите состојбата на хемороидите:
Јадете храна богата со растителни влакна
Растителните влакна заедно со доволна количина на вода, ќе ја омекнат столицата, со што ќе се олесни нејзиното исфрлање и ќе се намали притисокот врз хемороидите. Јадете брокула, грав, пченица, овесни трици и свежо овошје. Внесувањето на растителни влакна преку додатоци во исхраната може да го намали воспалението и крварењето на хемороидите.
Вежбање
Умереното вежбање и секојдневното пешачење се поврзуваат со стимулирање на работата на дебелото црево.
Не го одложувајте одењето во тоалет
Одете во тоалет веднаш кога ќе почувствувате потреба за празнење на цревата, затоа што столицата може да се повлечи и подоцна да предизвика зголемен напор при празнење и притисок врз хемороидите. Исто така, можете да го научите телото да си создаде навика за редовно празнење. За да го направите ова, одредете точно време во текот на денот (на пример после ручек) и седете во тоалетот неколку минути.
Седење во топла вода
Седењето во топла вода може да го намали чешањето и иритацијата околу аналниот отвор. Одделете дваесетина минути за да го направите ова после секое празнење на цревата, а во некои случаи и почесто. После тоа, нежно исушете го делот околу анусот без триење.
Кремови за хемороиди, мраз или перница
Постојат различни видови на кремови за хемороиди кои ја ублажуваат болката. Мразот исто така може да помогне во намалувањето на болката и отокот во пределот на хемороидите. Наместо да седите на тврда површина, поставете перница и седете на неа за да го намалите отекувањето на хемороидите и да го спречите создавањето на нови.
Има доста луѓе кои се соочуваат со овој проблем. Иако хемороидите можат да се држат под контрола, посоветувајте се со лекар за да избегнете влошување на нивната состојба како и нивно хируршко отстранување.
