Ново истражување сугерира дека постењето не треба да се практикува само од религиозни туку и од здравствени причини
Истражувачите изјавуваат дека спроведувањето на петдневна диета од овој тип и тоа само еднаш во месецот, подобрува повеќе здравствени аспекти во организмот. Редуцирањето на ризикот од развој на кардиоваскуларни болести е најважната придобивка велат тие. Некои сметаат дека јадењето го скратува животот и лакомството може да доведе до појава на разни болести, како што е дијабетесот.
Диетата што го намалува дневниот внес на храна до 40%, познато како ограничување на калориите, ја зголемува долговечноста.
Иако некои помали студии кои испитувале пократок временски период, сугерираат дека ограничувањето на калориите има метаболички придобивки кај луѓето, сепак не е потврдено дека постењето го зголемува човечкиот животен век.
Дури и ако навистина калоричното ограничување ни додава години во нашиот живот, малкумина се тие што можат и кои редовно практикуваат да постат, т.е. да јадат малку во период од неколку дена по ред и тоа редовно, значи еднаш или неколку пати во годината. Геронтолошкиот истражувач д-р Валтер Лонго – Valter Longo од Универзитетот од Јужна Калифорнија во Лос Анџелес,покажа дека постењето по пат на краткотрајно тотално апстинирање од храна ги намалува несаканите последици од хемотерапијата, како што се заморот и ослабеноста. Студиите на животни пак, сугерираат дека ваквиот начин на постење предизвикува здравствени придобивки слични како кај калоричните ограничувања.
За новото истражување д-р Лонго и неговите колеги составиле диета којашто не е толку екстремна како вистинското гладување, а сепак може да ги поттикне придобивките од постењето.
Во текот на два периоди од по четири дена секој месец, средовечните глувци биле хранети со ниско-протеинска и ниско-калорична исхрана. Останатиот дел од месецот тие можеле да јадат колку што сакале и што сакале. Глувците кои ја држеле диетата со постење ги надживеале своите врсници за просек од 3 месеци, што претставува значителен период за глодарите. Тие исто така покажале бројни знаци на подобро здравје. Како што истражувачите изјавиле во зборникот Cell Metabolism каде што е објавено истражувањето, глувците имале за 40% помала шанса да се разболат од канцер.
Нивото на шеќерот во крвта опаднало за 40%, а количеството на инсулин било за 90% помало. Иако функцијата на мозокот обично опаѓа со староста, глувците кои постеле задржале повеќе од своите ментални способности. Истражувачите сметаат дека ова можеби е последица на тоа што мозоците на глувците создавале повеќе неврони во хипокампусот, делот одговорен за меморијата.
„Сметаме дека диетата што го имитира постењето подмладува“ – заклучува д-р Лонго.
Истражувачите исто така тврдат дека овој режим на исхрана го поттикнал капацитетот кај животните да ги обновуваат своите ткива. „Ова е најинтересното откритие“ – истакнува д-р Лонго. Регенерацијата на црниот дроб била побрза кај единките кои постеле, додека пак балансот на различните типови клетки во нивната крв бил подмладен. Бројот на одредени матични клетки исто така бил зголемен кај нив. За да одредат дали повременото постење може да има исто влијание кај луѓето, истражувачите составиле мени од енергетски плочки (мусли барови), супи, чаеви и грицки. Дневниот калоричен внес изнесувал од 725 до 1090 калории. „Не е како јадењето равиоли, но подобро е отколку ништо“ – вели д-р Лонго.
Студијата се состоела од 19 испитаници и 19 волонтери во контролната група за да се проверат придобивките од имитирањето на постењето во диетата кај луѓето. Слично како глувците, испитаниците постеле само 5 дена, а остатокот од месецот биле вратени на вообичаените прехранбени навики. Бенефитите биле видливи по само три повторувања. Гликозата во крвта им се намалила, стомачните масти исто така и намалено било нивото на протеинот поврзан со зголемениот ризик од срцеви болести. Авторот на студијата и неговите колеги исто така увиделе мало зголемување на изобилството на некои матични клетки во крвта, што сугерира дека ваквата диета може да предизвика регенерација кај луѓето.
Други истражувачи сметаат дека резултатите од оваа студија се охрабрувачки. „Оваа едноставна диететска промена може да се спротивстави на сите овие варијабли на стареењето и мислам дека тоа е многу импресивно“ – истакнува молекуларниот биолог Кристофер Хајн – Christopher Hine од Факултетот за јавно здравје на Харвард во Бостон. Студијата покажува дека намалувањето на калориите цело време не е потребно.
Новата диета што го имитира постењето исто така се смета за доста практична во споредба со некои рестриктивни диети.
„Ограничувањето на калориите отпадна во човечките обиди“ затоа што се навистина тешки за спроведување – вели геронтологот Рафаел Де Кабо – Rafael de Cabo од Американскиот Национален Институт за стареење во Балтимор, Мериленд, кој водел една од студиите за калорично ограничување врз мајмуни. Тој вели дека режимот што го истражувале неговите колеги е „остварлив“.
Покрај придобивките, постењето со себе може да носи и низа негативни последици по здравјето. Постењето како Буда е опасно, па дури и диетата што го имитира постењето може да биде опасна и штетна за некои луѓе како што се дијабетичарите, истакнуваат истражувачите. Лицата кои примаат одредена терапија исто така не се најсоодветни кандидати за оваа диета. Научниците треба да продолжат да истражуваат на кој начин овој режим функционира и кој од него има корист, а кој штета.
Треба да се има во знаење дека просечен возрасен човек има потреба од 2 000 до 3 000 калории дневно. Се смета дека луѓето кои што следат калорично ограничување можат да се ограничат на околу 1 200 калории. Исто така треба да сте свесни за физичкиот напор што го имате, па согласно тоа да процените дали количеството калории што ви го обезбедува постењето ќе биде доволно за да го издржите здраво тој физички напор? Затоа пред да започнете да експериментирате со исхраната на своја рака, најдобро е претходно да се консултирате со вашиот лекар за да проверите дали сте здравствено подготвени и дали начинот на кој сакате да постите ќе биде добар за вас.
