otkrien-nov-lek-sto-ja-zabrzuva-regeneracijata-na-tkivata
Споделете со пријателите!

Целта на истражувањата врз овој лек во иднина ќе биде проверката дали овој лек може да го забрза обновувањето на ткивата на сите органи во целото тело
Истражувачите во САД откриле лек, којшто драстично ги подобрува оштетувањата на дебелото црево, црниот дроб и коскената срцевина кај глувците, без несакани последици. Овој лек дури и спасил многу од животите на глувците, кои во нормални услови би умреле, како резултат на трансплантацијата на коскена срцевина.

Овој лек, сè уште не е тестиран врз луѓе, но тимот научници сега работи на случајот за овој лек да биде адаптиран и за човечка употреба во следните три години. Главната придобивка од овој иновативен лек би било драстичното намалување на времето на закрепнување по операциите и повредите и би можел да спаси многу животи.

„Ние сме многу возбудени“, истакна главниот истражувач Д-р Сенфорд Марковиц – Sanford Markowitz, онколог од Case Western Reserve University во САД, за време на прес-конференција.

„Ние развивме лек, кој делува како витамин за матичните клетки на ткивата, стимулирајќи ја нивната способност за обновување на ткивата значително побрзо“ – истакна Д-р Марковиц.

Според почетните резултати од тестовите спроведени врз животни, објавени во списанието – The Journal Science, научниците најпрво ќе настојуваат дејството од овој лек да го испитаат кај пациентите со улцеративен колитис, но и кај трансплантацијата на коскена срцевина или операција на црниот дроб. Целта на истражувањата врз овој лек во иднина ќе биде проверката дали овој лек може да ја забрза регенерацијата на ткивата во целото тело.

„Лекот ги поправа оштетувањата во повеќе ткива, што нас ни потврдува дека може да има примена во лекувањето на многу болести“, вели Д-р Марковиц.

Лекот со чудно име „SW033291“, функционира на тој начин што ги ослободува природните молекули во телото наречени простагландин Е2 или PGE2. Научниците од поодамна знаеле дека PGE2 помага во пролиферацијата (зголемувањето) на бројот на возрасни матични клетки. Ова има значајна улога во лекувањето со помош на диференцијација во нови типови клетки, според ткивата во кои се наоѓаат.

Прочитајте:  Трансплантација на коскена срцевина олеснета со зајачки вирус

Во претходните истражувања, Д-р Марковиц изјавува дека постои друг генетски продукт пронајден во човечкиот организам 15-PGDH, којшто ја деградира и редуцира количината на PGE2. Од неговиот тим излегоа со хипотеза дека доколку пронајдат начин да го блокираат 15-PGDH, ќе бидат во состојба да го поттикнат обновувањето на ткивата со одржување на високи нивоа на PGE2. Затоа тие биле во потрага по соодветно хемиско соединение кое би можело тоа да го стори. Токму овој нов лек „SW033291“ ја има таа функција.

„Соединението SW033291 функционира со неверојатно голема моќност“, рече Д-р Марковиц. „Тоа може да го деактивира 15-PGDH кога ќе се додаде во само еден дел од 10 билиони во реакциона маса, што значи дека ја има способноста да функционира како лек“.

Понатамошните тестови покажаа дека не само што овој нов лек го деактивира функционирањето на 15-PGDH во лабораторија, тој исто така одлично функционира и кога бил инјектиран во животинските модели. Всушност, кај глувците на кои им бил даден SW033291, крвните вредности по трансплантација на коскена срцевина се нормализирале и тоа шест дена побрзо од глувците на кои не им бил даден лекот. Лекот исто така, речиси во целост ги излечил глувците со чир во дебелото црево и им помогнал на глувците со отстранети делови од црниот дроб, да им се регенерира ткивото на овој орган речиси двојно побрзо за разлика од контролната група.

Научниците исто така го тестирале овој лек врз глувци кои добиле смртоносни дози на радијација пред да им биде извршена парцијална трансплантација на коскената срцевина. Само единките на кои им бил даден лекот SW033291 преживеале.

Бидејќи сите овие истражувања на живи модели поминале без несакани последици, дури и кога биле употребени екстремно големи дози од лекот, според научниците следен чекор е да се спроведат истражувања врз поголеми животни, а доколку сè се одвива како што треба, планираат да го тестираат SW033291 и врз луѓе за три години.


Споделете со пријателите!