Маслото од авокадо може да го намали и ризикот од појава на акни.
Маслото од авокадо е најдобро познато по својата примена во готвењето на различни вкусни јадења но тоа, исто така, може да придонесе за одржување на добра нега на кожата. Всушност, бидејќи е богато со омега-3 масни киселини и витамини А, Д и Е маслото од авокадо е главна состојка во многу креми и навлажнувачи за кожа, како и средства за заштита при сончање.
Но кои се, всушност, придобивки од маслото од авокадо за кожата и кои се најдобрите начини за негова примена?
Ја хидратира и негува кожата
Освен витаминот Е, маслото од авокадо содржи калиум, лецитин и многу други хранливи материи кои можат да ја негуваат кожата и да ѝ дадат хидратација. Најгорниот слој на кожата, познат како епидермис, лесно ги апсорбира овие хранливи материи, кои, исто така, помагаат во формирањето на нова кожа.
Ги ублажува симптомите на псоријаза и егзема
Антиоксидансите и витамините содржани во маслото од авокадо можат да помогнат во третирањето на сувата и иритирана кожа од егзема и псоријаза. Сепак пред да се употреби, се препорачува лицата со здравствени состојби на кожата прво да го тестираат маслото на мал дел од кожата за да се осигураат дека тоа нема да предизвика иритација или да ги влоши симптомите на егзема.
Помага во третирањето на акни
Доколку го оставите краток период на кожата и потоа го исплакнете со топла вода, маслото од авокадо ќе ја задржи нејзината хидратантност без да остави масни остатоци. Со ова дејство маслото од авокадо може да го намали и ризикот од појава на акни. Тоа, исто така, има анти-воспалителни ефекти кои помагаат во намалувањето на црвенилото и воспалението од акни.
Го забрзува заздравувањето на рани
Маслото од авокадо може да помогне за побрзо заздравување на различни типови рани. Една студија од 2013 година покажа дека есенцијалните масни киселини и олеинската киселина во маслото од авокадо можат да ја поттикнат синтезата на колаген, што е процес на создавање на ново сврзно ткиво. Есенцијалните масни киселини коишто ги содржи маслото од авокадо, исто така, може да помагнат во намалувањето на воспалението во текот на процесот на лекување на рани. Меѓутоа, потребни се повеќе студии за да се утврди дали маслото од авокадо може да се користи токму за лекување на рани.
Помага во третирањето на изгореници
Антиоксидансите во маслото од авокадо можат да помогнат во ублажувањето на симптомите од изгореници од сонце. Според истражување од 2011 година, витаминот Е, бета-каротенот, витаминот Д, лецитинот и есенцијалните масни киселини во маслото од авокадо можат да го потпомогнат лечењето на изгорениците и да ја смират кожата. Други студии, исто така, покажаа дека конзумирањето на авокадо може да помогне да се заштити кожата од штетното влијание на УВ-зраците.
Ја зголемува еластичноста на кожата
Некои студии открија дека конзумирањето на здрави масти, како оние што се наоѓаат во авокадото, може да помогнат кожата да ја задржи својата еластичност. Сепак, истражувачите допрва треба да се осврнат на тоа дали примената на масло од авокадо на кожата го има истиот ефект.
Го подобрува здравјето на скалпот
Примената на масло од авокадо на скалпот во форма на топла маска може да помогне во намалувањето на првутот, како и третирањето на други проблеми предизвикани од сув скалп.
Други придобивки од маслото од авокадо
Истражувањата покажуваат дека маслото од авокадо може да помогне во спречувањето на неколку здравствени проблеми, вклучувајќи дијабетес и висок холестерол. Студија од 2017 година заклучи дека со маслото од авокадо може да се намали оксидативното оштетување што предизвикува оштетување на бубрезите кај луѓето со дијабетес тип 2. Резултатот произлегува од олеинската киселина или „здрава“ маст, која е основна компонента на маслото. Сепак, потребни се повеќе истражувања кај луѓето, пред ова тврдење да биде целосно поддржано.
Олеинската киселина е позната по својата способност да го намали ризикот од развој на некои видови рак, да го спречи појавувањето на некои автоимуни болести, да ја забрза регенерацијата на клетките и да помогне во елиминирање на бактериските инфекции.
Друга студија откри дека олеинската киселина може да помогне да се намали воспалението и болката поврзана со артритис.
Несакани ефекти од маслото од авокадо
Ризикот од несакани ефекти на маслото од авокадо е мал, но можен доколку лицето е алергично на авокадо или масло од авокадо.
Најдобар начин да се отфрли можноста за алергија е да се направи тест на кожата со лепенка. Доволно е да се нанесе мала количина масло од авокадо на лепенка и да се залепи на внатрешниот дел од кожата на раката. Доколку не се појави иритација во период од 24 часа, маслото може безбедно да се користи на други делови од кожата.
