kako-da-go-izbegnete-urgentniot-centar-za-vreme-na-praznicite
Споделете со пријателите!

Месецот кој доаѓа ни носи голем број на празници, а ние треба да внимаваме на обилните оброци, алкохолните пијалаци и неколку други работи за да останеме здрави
Празниците кои се пред нас се можеби најубавиот дел од годината кога целото семејство се собира заедно на едно место. Разновидната храна и пијалаци одат пропратно со ваквите празници, но за да не завршиме во болница поради било каква причина најдобро е да внимаваме на следните работи.

Внимавајте на солта во јадењата

Различните јадења за време на празниците знаат да содржат одредена количина на сол која може да биде штетна за луѓето кои имаат срцеви заболувања или пациентите на дијализа. Овие луѓе може да бидат особено чувствителни на солта во храната, особено кога станува збор за прејадување, што не е редок случај за време на празниците. Нивното тело не може да го преработи вишокот на сол што се внесува во организмот, па за да не дојде до некои посериозни последици треба да го имаме ова во предвид.

Не заборавајте да ги испиете потребните лекови

Доколку сте надвор од дома, не заборавајте да ги земете со себе потребните лекови. Многумина забораваат или свесно одлучуваат да ги прескокнат лековите додека не се дома, но тоа е сосема погрешен избор. Пропуштањето на лек може да биде доста опасно за дијабетичарите или луѓето со висок крвен притисок, на пример. За да не се случи нешто сериозно, секогаш носете ги лековите каде и да одите и не заборавајте да ги испиете.

Различни видови на повреди

Повредите со нож се доста чести за време на празниците, па затоа внимавајте на ракувањето со приборот за сечење. Исто така, избегнувајте ги лизгавите површини по дворовите или тротоарите за да не завршите во болница со скршеница.

Прочитајте:  Совети за постигнување баланс меѓу работата и личниот живот

Не влегувајте во расправии или тепачки

За време на празниците целото семејство се собира на едно место и многу често можеме да се видиме со некој роднина или пријател со кого не се сложуваме многу добро. Алкохолот и ладното време можат да бидат последната капка за да настане расправија, или уште полошо, физички конфликт. Бидете трезвени и избегнувајте ги ваквите случки.

Проблеми со стомакот и срцето

Обилните оброци и зголеменото количество на алкохол кое се пие за време на празниците може да ве однесе во болница. Постои опасност од прејадување или препивање и тоа може да предизвика стомачни тегоби заради кои може да се заврши во болница. Или пак, што е уште полошо постои опасност од труење со храна. Од друга страна, претераното пиење може да предизвика проблеми со срцевиот ритам или други посериозни работи.

Не ја занемарувајте состојбата на депресија

Празниците можат да бидат тежок период за некои луѓе кои се сами или се чувствуваат осамено. Во некои екстремни случаи дури може да се појават и самоубиствени мисли. Без разлика дали е период на празници или не, доколку сте осамени и се чувствувате тажно или депресивно потребно е да побарате стручна помош и да останете во контакт со други луѓе. Наместо да останете дома, дружете се со други луѓе иако тоа е можеби последното нешто што ви доаѓа на памет.

Имајте ги овие работи на ум и, што е најважно, уживајте во моментите поминати со вашите блиски за време на празничниот период.


Споделете со пријателите!