Дознајте кои комбинации на храна ви предизвикуваат надуеност
Добро познатата максима „Ти си тоа што јадеш“ и не е сосем точна. Точната дефиниција би била, „Ти си тоа како јадеш“, и секако, колку јадеш. Сигурно знаете дека солената храна и газираните пијалаци даваат чувство на надуеност, но исто така и комбинирањето на некои видови на храна. Несоодветните комбинации на храна може да доведат до чувство на надуеност, да создадат непријатни гасови, стомачни тегоби и зголемен умор. Секоја храна која што ја внесуваме во организмот, на свој начин влијае на дигестивниот систем. На одредена храна (протеини) му е потребно подолго време да се свари, додека на друга (овошје) пократко. Доколку се направи комбинација од различни видови на храна според овој критериум, желудочни киселини се неизбежни. Со правилно комбинирање на намирниците не само што го регулите варењето на храната, туку и максимално ги искористувате хранливите материи.
Еве неколку комбинации кои што ќе ви го вознемират стомакот и кои е најдобро да ги избегнувате:
Месо со овошје
Планирате да ги воодушевите гостите со печено месо во сок од брусница? Знајте дека со оваа комбинација ќе им создадете стомачни тегоби и немирна ноќ. Овошје и месо е комбинација која секогаш треба да се избегнува. Всушност, овошјето не треба да се комбинира со друг вид на храна, а особено не со протеини. Причината за тоа е дека овошјето содржи едноставни шеќери кои лесно се апсорбираат и не се задржуваат долго време во стомакот. Од друга страна, храната богата со масти, протеини и скроб, останува подолго време во стомакот. Затоа, доколку се консумира овошјето во комбинација во месо, неговиот шеќер ќе остане предолго во стомакот, ќе ферментира, што ќе резултира со желудочни киселини. Исто така, не е поволно да се јаде овошје после јадење, што е честа пракса во македонските домови.
Житарици со млеко и сок од портокал
Оваа комбинација претставува чест избор за појадок, кој се смета за здрава опција, но не и најповолна за стомакот. Киселините во сокот од портокал го уништуваат ензимот задолжен за варењето на скробот застапен во житариците. Така, наместо да ги консумирате во исто време, сокот од портокал испијте го триесет минути пред житариците со млеко.
Рижото со пилешко
Ова вкусно јадење ја отежнува работата на стомакот. Скробот и протеинот имаат различни дигестивни ензими, скробот има потреба од алкална средина, додека повеќето протеини од кисела. Така, кога се комбинираат овие две групи, предизвикува чувство на надуеност и гасови. Затоа, секогаш треба да се избегнува комбинирање на видови на храна како паста, ориз, леб и компири, сервирани со пилешко, стек или риба.
Морски плодови и месо
Колку и да изгледа примамлив и богат ваквиот ручек, пробајте да го избегнете. Секој оброк треба да содржи еден вид на протеин, бидејќи на протеинот му е потребно многу енергија за да се свари. Така, комбинацијата на протеин и протеин, го задолжува стомакот напорно да работи наредните осум часа, додека вие ќе се чувствувате уморни, надуени и без енергија. Совет: рибата јадете ја во комбинација со зеленчук подготвен на пареа.
