Надуен стомак е проблем со кој се соочуваат се поголем број на луѓе. Прочитајте што може да направите за да си помогнете
Надуеноста може да предизвика притисок и непријатност во стомакот и честопати го прави стомакот да изгледа поголем. Помеѓу најчестите причини што може да предизвикаат надуеност се наоѓаат обемната исхрана како и видот на производи или состојки кои секојдневно ги внесуваме, а можеби нашиот организам не ги поднесува. Еве што може да направите за да ја намалите надуеноста на стомакот.
Избегнувајте обилни оброци и мрсна храна
Јадете помали оброци почесто во текот на денот, а избегнувајте ги обилните оброци кои ве прејадуваат. После обилно хранење нормално е стомакот да биде надуен затоа што сте изеле поголемо количество храна одеднаш. За да ја избегнете оваа состојба, препорачливо би било да јадете помали оброци повеќе пати дневно. Мрсната храна се вари побавно и се задржува подолго во стомакот, па може да предизвика непријатност и надуеност. Ограничете го внесувањето на храната богата со маснотии. Џвакајте ја храната подолго и со тоа ќе го намалите количеството на воздух кое го голтате со храната (нешто што е исто така причина за надуеност). Не брзајте додека јадете. Јадете побавно и ќе го избегнете чувството на непријатност во стомакот.
Намалете го количеството на проголтан воздух
Гасовите во стомакот можат да бидат предизвикани на два начини. Скоро половина од количеството на гасови во дигестивниот систем е проголтан воздух кога јадеме или пиеме. Затоа се препорачува да се избегнува пиење преку цевка, џвакање мастика, и пиење газирани пијалаци. Не зборувајте додека јадете затоа што и на тој начин може да се зголеми количеството на проголтан воздух. Остатокот на гасови кои можат да се насоберат во цревата и да предизвикаат надуеност и тешкотија во стомакот се резултат на бактериите кои помагаат во варењето на храната.
Избегнувајте храна која предизвикува надуеност
Храната која тешко се вари може да е причина за надуеност, па доколку имате проблеми со надуен стомак тогаш препорачливо е да избегнувате ваква храна. Одреден вид на храна предизвикува повеќе гасови од друг вид на храна. Можете да си направите листа на храната која вам ви предизвикува надуеност и да ја избегнувате во иднина. Еве некои видови на храна кои можат да предизвикаат гасови:
- Гравот и леќата спаѓаат во групата на предизвикувачи на гасови
- Овошје и зеленчук како кајсии, сливи, круши, лубеница, зелка, карфиол, моркови, лук, кромид, итн. можат да бидат причина за надуеност
- Млечните производи спаѓаат во оваа група особено ако имате проблеми со лактоза
- Житарките се здрава храна, но понекогаш знаат да предизвикаат тегоби и надуеност затоа што се богати со растителни влакна. Храната богата со растителни влакна може да предизвика гасови во цревата. Пијте многу вода кога јадете храна богата со влакна. Тоа помага во намалување на надуеноста.
Доколку вашиот организам не поднесува лактоза, фруктоза или глутен тогаш се препорачува да се избегнуваат. Ако се сомневате дека сте алергични на некаков вид на храна, консултирајте се со лекар.
Пијте вода и вежбајте
Пијте повеќе вода за да ги исфрлите непотребните материи од организмот. Водата ќе ви помогне да ја намалите надуеноста, исто како и вежбањето. Вежбањето ги стимулира цревата и е важен фактор во намалувањето на гасови во стомакот.
