Со мотото „Поддршка на родителите за да се одржи доењето“ (Support parents-enable breastfeeding), оваа година Светската асоцијација за доење (WABA) ја промовира светската недела на доењето која се одбележува секоја година, од 1-7 август. Со ова се потенцира потребата од давање поддршка на семејствата и мајките, како и од сите чинители во општеството, да го одржат доењето.
Доењето е еден од најважните начини на за унапредување и чување на здравјето – наведува Мими Кимовска Христов, специјалист педијатар и претседател на поткомитетот за промоција, заштита и поддршка на доењето при Министерство за Здравство на РМ по повод Светската недела на доењето.
Д-р Кимовска Христов истовремено потсетува дека доењето е еден од најважните начини за унапредување и чување на здравјето. Тоа е најдобриот начин на исхрана на доенчињата, ја поставува основата за добро здравје не само во периодот на детството, туку и во адултната возраст, воедно носи и голем број бенефити за мајките и за општеството во целост придонесувајќи кон остварување на сите 17 цели за одржлив развој на ОН.
Во согласност со препораките на Светската здравствена организација (СЗО) доењето треба да е ексклузивно во првите 6 месеци од животот, да трае до 2 години и подолго, паралелно со воведување други видови храна по 6-от месец.
Зошто доење и зошто мајчино млеко
- Мајчиното млеко е совршено дизајнирано да ги задоволи потребите на бебето од хранливи материи. Тоа содржи:
- Заситени и незаситени масти, како и холестерол, кои се неопходни за развој на мозокот и нервното ткиво. Мастите во мајчиното млеко се подобро сварливи од тие во адаптираната млечна формула.
- Протеини и јаглехидрати кои се така “дизајнирани” за да можат најдобро да се искористат од бебето а без да предизвикаат проблеми со бубрезите.
- Многу витамини и минерали во комбинација која многу лесно се апсорбира од бебето.
- Специјални протеини од имуниот систем кои го штитат бебето од дијареја, алергии на храна и инфекции. Во овие имуно-протективни компоненти спаѓаат:
- Лактоферин: се врзува за железото и го прави недостапно за бактериите и вирусите.
- Лизозоми и млечни леукоцити: ги уништуваат бактериите и вирусите
- Секреторен IgA: имуноглобулин кој ги уништува бактериите и вирусите
- Бифидус фактор: го поттикнува развојот на корисни бактерии во цревата и го успорува растот на бактерии кои предизвикуваат болести
- Доењето овозможува силна емоционална врска помеѓу мајката и бебето. Хормоните кои се лачат за време на доењето имаат смирувачко дејство за мајката. Доењето овозможува поблизок интимен контакт на мајката со нејзиното бебе и повеќе заеднички моменти. Сетилото за допир кај бебето по породувањето е развиено значително повеќе од другите сетила. Блискиот контакт на бебето со мајката овозможува подобро меѓусебно поврзување
- Мајчиното млеко е достапно во секое време и на секое место без претходна подготовка. Тоа е најевтин начин на исхрана, секогаш е на располагање, со идеална температура и идеален состав во однос на возраста на бебето.
- Доењето го штити бебето од многу болести како за време на доењето, така и во подоцнежна возраст. Меѓу нив спаѓаат инфекции на ушите, инфекции на горен и долен респираторен тракт, гастроинтестинални инфекции, настинки и други. Не само што бебињата кои се доени се разболуваат помалку, туку и времетраењето на болеста е скратено а симптомите се поблаги и побрзо поминуваат.
- Доењето го намалува ризикот од развивање на алергии кај бебињата. Исто така, бебињата кои се на мајчино млеко имаат помалку стомачни проблеми и немаат толку често дијареја и запек.
- Доењето јa поттикнува интелигенцијата кај бебето.
- Доењето го штити бебето од добивање на прекумерна тежина и го намалува ризикот од ненадејна смрт на новороденчето (Sudden infant death syndrome – SIDS)
- Со доење се намалува стресот и ризикот од пост-породилна депресија кај мајката. Со доењето се губат калории и мајката побрзо се враќа на тежината што ја имала пред да остане бремена. Докажано е дека мајките кои дојат имаат помал ризик од добивање на тумор на дојки, висок крвен притисок, кардиоваскуларни болести и исто така имаат намален ризик од тумори на матката и јајниците.
- Со доењето нема загадување на животната средина. Мајчиното млеко е природно обновлив извор на храна за кој не е потребно пакување, транспорт и нема отпадни материи.
Со цел доењето биде успешно, на мајките им е потребна континуирана поддршка во сите фази од мајчинството, почнувајќи од периодот пред зачнувањето, во текот на бременоста и особено по породувањето, како во кругот на семејството, така и на работното место.
