Една од причините за болни брадавици е неправилно поставување на бебето на градите
Доењето е вештина која не е вродена и мајките ја учат. Како и секое друго учење на нови вештини, тоа може да потрае одреден период и тогаш на мајката ѝ е потребна максимална поддршка од семејството како и од стручни лица, со цел носење одлука за ексклузивно доење. Болни брадавици во првите недели од доењето е честа појава која треба брзо да се спречи, бидејќи многу мајки се одкажуваат од актот на доење. Причината за оваа појава е лошо поставување на бебето на градите.
Трпение, време и примена на некои едноставни мерки за правилно поставување на бебето на градите се најчесто доволни мерки за да се реши проблемот.
Еве неколку предлози кои може да помогнат за да се справите со болката во брадавиците:
Пред хранење
- Понудете му храна на вашето бебе веднаш штом ги почувствувате првите знаци за неговата потреба пред да почне да плаче;
- Обезбедете си атмосфера која е релаксирачка за да се чувствувате опуштено (пригушена светлина, музика, удобно седење итн.);
- Нежна масажа на градите се применува за да се помогне полесното истекување на млекото при актот на доење;
- Поставување на бебето на вашите гради пред доењето со цел да се обезбеди контакт кожа со кожа;
- Измолзување на мала количина млеко за да се омекне ареолата и да се подмачка брадавицата.
При доење
Бидете сигурни дека бебето е правилно поставено на дојка. За помош при ваков проблем може да се обратите кај патронажна сестра или здружение за поддршка на доењето во вашето место на живеење.
- Примена на различни позиции за доење;
- Ставање на доенчето прво на помалку болната страна.
- Доколку запчнатиот подој ви предизвикува болка прекинете го со вметнување прст на аголот од усната на бебето пред да се обидете да го тргнете бебето од градата.
После хранење
- Проверете ги брадавиците од знаци на стрес, како што се црвени ленти;
- Оставете го вашиот градник отворен на неколку минути додека брадавиците се исушат;
- Чувајте ги брадавиците суви. Често менувајте ги влошките за нега при доење.
Што треба да избегнувате
- Избегнувајте користење на било каков агенс што ќе предизвика сушење или оштетување на кожата на брадавицата (на пример шампон, груби крпи);
- Носете градници наменети за доење;
- Контактирајте го вашиот лекар, консултант за доење-патронажна сестра, или институција за поддршка на доењето за понатамошни инструкции.
Во повеќето случаи, болни или напукнати брадавици се резултат на неправилно позиционирање или неправилно фаќање на брадавицата. Понекогаш пукнатината на кожата на брадавицата може да е видлива и да се наоѓа на самата брадавица или можно е да биде зафатена и ареолата, а во некои случаи може да се појави и крв. Иако може да изгледа страшно, тоа не треба да биде причина за прекинување на доењето.
Мерки кои треба да се преземат при испукани брадавици
Да се најде причината. Дали тоа е неправилно позиционирање, здравствени проблеми како што се инфекција или дерматитис на брадавиците, или анатомски проблеми кај јазикот на бебето или оштетување од неправилна употреба на пумпи за измолзување. Можеби ќе треба да се паузира 12 – 24 часа за да се овозможи побрзо заздравување.
Во таква ситуација се применува измолзување на млекото со цел продолжување на исхрана со мајчино млеко. Бидете посебно внимателни со позиционирање. Доколку проблемите продолжат и заздравувањето е бавно, побарајте стручна помош.
