Настинка кај бебињата

Првите две години од животот на бебето се проследени со голем број на настинки 

Настинката е нешто вообичаено. Според некои статистики, во првите две години од животот бебето просечно прележува 8-10 настинки. Она што ја разликува настинката кај бебето од таа кај возрасните, е тоа што за бебето таа може да биде понепријатна. Често пати настинката кај бебето може да биде пропратена и со инфекција на увото. Настинката е многу непријатно искуство и за бебето и за родителите. Иако најчесто нема да остави последици, гледањето како страда бебето е тешко за неговите родители. Бебето може да има затнат нос, потешкотии во дишењето, ако му е затнат носот нема да може нормално да цица и т.н. Сепак бидете храбри, за неколку дена настинката ќе помине.

Немојте да му давате на своја рака никакви лекарства, знаејки дека секое лекарство може да има штетни последици. За секое лекарство задолжително консултирајте се со неговиот лекар. 

Ако бебето има температура, не јаде, губи интерес за околината, постојано плаче, кашла или има зелен секрет од носот, задолжително однесете го на лекар. Особено ако се работи за бебе помало од 3 месеци.

Иако настинката обично е безопасна, доколку не се третира соодветно, кај мали бебиња може да премине во посериозни инфекции, како воспаление на белите дробови.

Што ја предизвикува настинката

Настинката најчесто е предизвикана од вирус. Имунолошкиот ситем на бебето сè уште не е целосно развиен и работи со само 60% од неговиот капацитет. Тоа го прави бебето посклоно кон разни инфекции, меѓу кои и настинката. Вирусот може да се пренесува преку физички контакт или преку дишење. Внимавајте на хигиената, a исто така внимавајте бебето да не доаѓа во контакт со заболени лица. Ако вие имате настинка, мијте ги рацете што почесто, а задолжително после бришење на носот.

Симптоми на настинка кај бебето

Карактеристични симптоми за настинка кај бебето се: температура 38 степени или повеќе, кашлање, течење од носот, болно грло, зацрвенети очи и сл. Исто така бебето може да биде нервозно и да има намален апетит. Затнатиот нос ќе биде пречка во нормалната исхрана, а најверојатно ќе имате и неколку непроспиени ноќи. Малите деца не можат да го издуваат носот, па ќе треба да обратите внимание на тоа носот да му го бришете почесто. Симптомите на настинката обично трааат 3-10 дена, иако кај мали бебиња можат да продолжат и до 2 седмици.

Како да ја избегнете настинката кај бебето

Доењето претставува најдобриот начин да го заштите здравјето на вашето бебе. Преку доењето бебето прима од вашите антитела и тоа му дава поголема отпорност. Симптомите на настинка кај доените бебиња вообичаено се поблаги од оние кај бебињата хранети со вештачко млеко. Немојте да дозволувате бебето да престојува во просторија кај што се пуши. Децата чии родители пушат, почесто заболуваат од настинка и настинката трае подолго. Обидете се да ја намалите можноста бебето да дојде во контакт со настинати луѓе. Доколку е болен некој член од семејството, обратете поголемо внимание на хигиената.

Што можете да направите во случај на настинка кај бебето

Не можете да направите многу за да му помогнете на бебето да оздрави, но има некои работи со кои ќе можете да му ја олесните ситуацијата:

Ако бебето има затнат нос, поткренете му ја главата на 1 или 2 крпи. Немојте да користите перници, затоа што може да дојде до гушење на бебето. Ако бебето плаче затоа што му е затнат носот, земете го во раце во полуисправена положба. Тоа ќе му го олесни дишењето. Давајте му доста течности, а доколку го доите давајте му почесто да цица.

Бришете го почесто носот на бебето. Во консултација со лекарот можете да побарате да му препише благи капки (солен раствор), кои ќе му ги ставате 15 минути пред доењето. Тоа ќе му помогне на бебето да може да дише низ носот додека цица.

Во купатилото можете да ја пуштите жешката вода за да се направи пареа и да го држите бебето таму, да дише околу 15 минути. Потоа преслечете го во суви алишта.

Собата нека биде пријатно топла. Не дозволувајте воздухот во собата да биде сув. Ако греете, ставете садови со вода или влажни крпи околу грејните тела за водата да испарува и да го навлажнува воздухот.

Немојте да му давате никави лекарства, ако не се препишани од лекарот.
Немојте да дозволите пушење во просторијата каде што е бебето.

Ако вашето бебе има затнат нос но нема други симптоми, проверете да не има ставено некој предмет во носот.

Иако ви е тешко, имајте во предвид дека настинката ќе помине. Не значи дека секоја настинка во иднина ќе биде со истата јачина на симптомите. Понекогаш симптомите може да бидат многу благи. Една позитивна страна од настинката е што му помага на имунолошкиот систем да зајакне за во иднина.